Kombëtarja Shqiptare rikthehet të luajë këtë fundjavë në Nations League përballë Izraelit dhe Islandës. Shqipëria nuk është në një moment të mirë teksa mungon shija e fitores. Në 10 ndeshjet e fundit, 3 pikët janë marrë vetëm ndaj Hungarisë dhe dy ekipeve amatore si Andorra dhe San Marino në kualifikueset e Botërorit. 10 gola ka shënuar ekipi kuqezi, 5 nga të cilat u shënuan ndaj San Marino. 11 herë jemi ndëshkuar me ndeshjen në Angli ku u detyruam të nxjerrim topin 5 herë nga rrjeta.
Statistikat janë akoma më negative nëse marrim vetëm 5 ndeshjet e fundit. Tre barazime dhe dy humbje ka grumbulluar ekipi kombëtar. Rezultate alarmante nëse pretendojmë të përsërisim suksesin e Euro 2016. Ndeshjet me Izraelin dhe Islandën shihen si finale pasi në rast se do të humbasim përsëri pikë atëherë mund t’i themi lamtumirë vendit të parë në grup.
