Kryetari i Partisë Demokratike ka reaguar me anë të një postimi në rrjetin social “Facebook” lidhur me ngjarjen e ndodhur në Bashkinë e Lushnjes. Ai e konsideroi pashpirtësi, humbjen e jetës së 48-vjeçares Shpresa Cani në zyrën e kryebashkiakes. Duke iu referuar mesazhit të një qytetari dixhital, Berisha tregon se e ndjera është konfliktuar me drejtoreshën e drejtorisë së ndihmës ekonomike, Anila Çela e cila është bashkëshortja e deputetit të Partisë Socialiste, Bujar Çelës. Fakt ky, që u mohua nga deklarata zyrtare e Bashkisë.
Statusi i plotë
Pashpirtesi!! Shpresa Cani, 48 vjeç vdes në zyrën e kryebashkiakes së Lushnjes,Bashkia i hoqi ndihmen ekonomike! Pashpirtësi dhe vetëm pashpirtësi!
Te dashur miq, qytetari dixhital informon se gjendja shëndetësore e Shpresa Canit u rëndua pas debatit me punonjëset e Bashkisë Lushnje. Fillimisht 48 vjeçarja, Shpresa Cani ka debatuar me drejtorëshen e drejtorisë së ndihmës ekonomike, Anila Çela, bashkëshorte e deputetit Bujar Çela i PS-së, ku I është refuzuar përgjigje dhe zgjidhje për problemin e saj. Pas debatit, 48 vjeçarja ka kërkuar takim me kryebashkiaken Eriselda Sefa, duke arritur të shkojë deri në paradhomën e kryebashkiakes. Aty është tentuart të nxirret me forca nga Policia Bashkiake, ku dhe është ndjerë keq dhe ka ndërruar jetë.
48 vjeçarja, Shpresa Cani kishte shkuar në Bashkinë e Lushnjes për tu ankuar për heqjen e ndihmës. Cani ishte në kushte të vështira ekonomike por edhe shëndetësore. Duke shrehur ngushellimet me te ndjera familjes për humbjen e njeriut të dashur dënoj këtë akt çnjerëzor si vrasje shtetërore me terror psikologjik dhe ekonomik vdekjen e Shpresës në zyrat e shtetit nga zemërimi i shkaktuar nga pashpirtësia e zyrtarëve të sektit çnjerëzor të Rilindjes së Edi Ramës.
