Joyce DeFauw, më parë Joyce Viola Kane, filloi vitin e saj të parë në Universitetin e Illinois Veriore në 1951 me një plan për t’u diplomuar me një diplomë në ekonomi. Por këto plane ndryshuan kur DeFauw takoi një burrë në kishë, i cili i vodhi zemrën, tha ajo për CNN të enjten.
“Shkova në shkollë për tre vjet e gjysmë, por vendosa ta le pasi e takova” tha DeFauw.
Burri i veçantë ishte Don Freeman Sr. Të dy u martuan në vitin 1955 dhe patën tre fëmijë së bashku përpara se Freeman të vdiste, duke e lënë atë të ve për rreth pesë vjet.
Më pas, DeFauw u martua me burrin e saj të dytë të ndjerë, Roy DeFauw. Së bashku ata patën gjashtë fëmijë, duke përfshirë dy binjakë. Ajo ka 17 nipër e mbesa dhe 24 stërnipër.
“Mendoj se përmenda se isha e mërzitur që nuk mbarova shkollën dhe fëmijët e mi më inkurajuan të kthehesha”, tha ajo, kështu që u regjistrua në Illinois Veriore dhe filloi të merrte mësime.
DeFauw dikur ishte gjithashtu mësuese e shkollës të së dielës. “Ajo e ka pasur gjithmonë atë dashuri për të mësuar”,- tha Dooley.
“Kur bëmë telefonata në shkollë për një regjistrim të mëparshëm, ata habitën kur dëgjuan se po pyesnim për një student të viteve 50,” tha Dooley.
Por këtë herë, gjërat ishin shumë më ndryshe për DeFauw. Në vend që të shkonte në kampus për të ndjekur mësimin, ajo e ndoqi mësimin online nga shtëpia e të moshuarve.
“Ishte kompjuteri im i parë,” tha DeFauw, “Fëmijët e mi duhej të më mësonin se si ta përdorja atë.”
Kur filloi pandemia Covid-19 në vitin 2020, ajo ishte mirënjohëse për kompjuterin, tha Dooley. “Shkoi shumë mirë dhe ajo po lundronte në internet,” shtoi ajo.
“Ndonjëherë kam dashur të heq dorë, por nuk e kam bërë”,- tha DeFauw dhe tregoi se kishte mjaft inkurajim nga familja, miqtë dhe shkolla.
Drejtoresha e Studimeve të Përgjithshme Bachelor, Judy Santacaterina, ishte një ndihmë e madhe për DeFauw. Dooley tha se ajo mori rolin për të ndihmuar gjyshen e saj për të marrë diplomën dhe e gjithë familja është mirënjohëse për Santacaterina.
DeFauw studioi edhe gjatë veres. “Ajo është shumë e organizuar dhe ka një rutinë. DeHauw donte të vazhdonte të merrte mësime në mënyrë që të mos dilte nga ajo rutinë”,- u shpreh drejtoresha.
Tani, tre vjet më vonë, ajo do të veshë kapelën dhe fustanin dhe do të marrë një diplomë Bachelor të Studimeve të Përgjithshme nga universiteti këtë fundjavë.
DeFauw është mirënjohëse që pati mundësinë të kthehej në shkollë dhe të merrte diplomën e saj. “Është mirë të përfundoni diçka që keni filluar,” tha ajo.
Këshilla e saj për ata që mund të jenë në një situatë të ngjashme: “Mos u dorëzoni”, tha ajo, “E di që mund të jetë e vështirë, por çdo gjë në jetë ka uljet dhe ngritjet e veta.”
