Pas akuzave të bëra nga deputeti, Lefter Gështenja, në drejtim të MEPJ ku u shpreh se përmes “procedurave të luksit” po shpenzon për ‘siguracion udhëtimi’ për diplomatët e Shërbimit të Jashtëm që përfaqësojnë vendin tonë jashtë.
Ka reaguar ministrja për Evropën dhe Punët e Jashtme, Olta Xhaçka pas akuzave të bëra nga deputeti Lefter Gështenja, në lidhje me “procedurat e luksit”.
Gështenja, në drejtim të MEPJ shprehej se përmes këtyre procedurave, po shpenzohen edhe “siguracion udhëtimi” në lidhje me diplomatët e Shërbimit të Jashtëm i cili përfaqëson vendin tonë.
Reagimi i ministres Olta Xhaçka:
Jemi njohur sot me një deklaratë publike të deputetit të Kuvendit të Republikës së Shqipërisë, z. Lefter Gështenja, përmes së cilës ai akuzon MEPJ se, përmes “procedurave të luksit” po shpenzon për “siguracion udhëtimi” për diplomatët e Shërbimit të Jashtëm që përfaqësojnë Shqipërinë jashtë vendit.
Dëshirojmë të informojmë z. Gështenja që siç shkruhet e zezë mbi të bardhë në dokumentin e publikuar prej tij, por që ai mesa duket nuk di ta lexojë, MEPJ nuk ka prokuruar “siguracion udhëtimi” por mbulimin me sigurime shëndetësore, të shëndetit në udhëtim dhe të jetës së diplomatëve.
Dëshirojmë po ashtu të informojmë z. Gështenja, që udhëtimet dhe qëndrimi jashtë vendit janë një pjesë thelbësore e punës së çdo diplomati të Shërbimit të Jashtëm. Është kjo arsyeja përse ky Shërbim quhet i Jashtëm dhe përse kjo Ministri quhet Ministria për Evropën dhe Punët e Jashtme.
Mbulimi i sigurimeve shëndetësore, të shëndetit në udhëtim dhe jetës të diplomatëve kur ata shërbejnë jashtë vendit apo udhëtojnë për arsye pune, është një detyrim ligjor i MEPJ. Ky mbulim, në përputhje me ligjin, aplikohet prej dekadash dhe nuk është një praktikë e aplikuar për herë të parë gjatë vitit 2021.
Duhet theksuar po ashtu që edhe fondi i alokuar nga MEPJ për këtë procedurë prokurimi është i njëjtë me fondin e alokuar gjatë viteve të fundit dhe i parashikuar në Ligjin për Buxhetin e Shtetit.
Ligji nga ana tjetër, nuk parashikon askund mbulimin me “siguracion udhëtimi”, çka është edhe arsyeja përse MEPJ nuk ka shpenzuar asnjë qindarkë për një shpenzim të tillë.
Të akuzosh MEPJ përse paguan sigurimet e shëndetësore, të shëndetit në udhëtim dhe të jetës, të diplomatëve të Shërbimit të Jashtëm shqiptar është po aq e pakuptimtë sa të akuzosh MEPJ përse paguan qiratë e zyrave e të banesave të diplomatëve që përfaqësojnë Shqipërinë nëpër botë.
Ne besojmë që është e pajustifikueshme, për një deputet të Kuvendit të Shqipërisë që të lëshojë akuza të tilla të pabaza, në një kohë që ka akses tek i gjithë informacioni i nevojshëm për të kuptuar sesi qëndron realisht situata.
