Tensionet janë përshkallëzuar pas shpërthimeve në rajonin e shkëputur të Moldavisë, Transnistria, por eksperti i mbrojtjes thotë se nuk duhet të presim ende shumë zhvillime të mëtejshme për këtë.
Analisti i mbrojtjes dhe sigurisë, profesor Michael Clarke thotë se synimet e ardhshme të Rusisë janë “të paqarta”, por fokusi kryesor për momentin është në rajonin lindor të Donbasit.
Qyteti port i Odesës është “i sigurt për një kohë” dhe kufiri me Moldavinë është “problemi i muajit të ardhshëm”, thotë ai.
Për sa i përket luftimeve në Donbas, Clarke thotë se rusët po lëvizin “më ngadalë se sa do të dëshironin” dhe ata “nuk kanë marrë asgjë të rëndësishme”.
Fokusi i tyre kryesor janë Slovyansk dhe Kramatorsk, të cilat ata i kanë sulmuar nga ajri dhe me artileri, por këto zona nuk kanë rënë.
Ai thotë se derisa forcat ruse të arrijnë të marrin këto dy vende, “nuk do të ndodhë shumë”.
Rusia tërhoqi forcat e saj nga rrethi i Kievit dhe Chernihiv gjatë javëve të fundit për të kthyer vëmendjen e saj në rajonin e Donbasit, i cili ka qenë skena e luftimeve të ashpra midis forcave ukrainase dhe separatistëve pro-rusë që nga viti 2014. /Priza.al
