Presidenti Meta ka bërë një thirrje për të gjithë shqiptarët vetëm pak ditë para zgjedhjeve të 25 prillit. Kreu i shtetit tha se të gjthë qytetarët duhet të nisen drejt kutive të votimit më 25 prill, pasi përmes referendumit do të përmbyset qeveria.
Ai gjithashtu paralajmëron “të fortët” duke thënë se kush përdoret nga pushteti për presione e blerje votash, do i sekuestrohen edhe pulat. Duke ironizuar dhe Ramën, Meta paralajmëron gjithë zyrtarët që ”nuk kanë kartelë psiqike” mos e rëndojnë pozitën e tyre duke shkelur Kodin Zgjedhor.
Në një postim në mediat sociale, Presidenti u bën thirrje qytetarëve që të verifikojnë qendrat e tyre të votimit dhe të marrin sovranitetin që sipas tij është grabitur në zgjedhjet e fundit në Shijak dhe Durrës.
STATUSI NGA ILIR META
Edhe 4 ditë, që Sovrani të rimarrë në duart e tij sovranitetin e grabitur pabesisht dhe poshtërsisht me zgjedhje si ato të Shijakut, të Dibrës, dhe me ato të paligjshme vendore.
Të gjithë qytetarët të verifikojnë qendrat e tyre të votimit dhe me qetësi dhe vendosmëri të nisen drejt kutive të votimit në këto zgjedhje historike për vendin dhe kombin tonë për 100 vitet e ardhshme.
Asgjë nuk e ndal triumfin e vullnetit të Sovranit, që përmes Referendumit të 25 Prillit do ta përmbysë Fuks-Shtetin e “Rilindjes” dhe do të rivendosë shtetin e së drejtës dhe Llogaridhënien.
Të gjithë ju zyrtarë, që nuk keni kartelë psiqike, mos e rëndoni pozitën tuaj duke shkelur ligjin dhe Kodin në ditët dhe orët, që vijnë.
Të gjithë ju “të fortë”, që po përdoreni nga pushteti kriminal për presione dhe blerje votash, bëhuni gati se edhe pulat do t’ua sekuestrojmë!
Kush prek votën e 25 Prillit ka sulmuar sovranitetin e popullit dhe të Republikës së Shqipërisë dhe do trajtohet si armik i Republikës dhe Kushtetutës!
Kush shet votën, shet nderin e familjes së tij dhe nuk e meriton të quhet njeri dhe kurrsesi shqiptar.
Përpara me qetësi e vendosmëri drejt qendrave të votimit, për Shqipërinë europiane, që ristarton fuqishëm më 25 Prill.
SHQIPËRIA DO TË JETË E SHQIPTARËVE PËRJETËSISHT! ??
