Deputeti i PD-së, Tritan Shehu ka dorëzuar këtë të martë në Kuvend kërkesën për mocion me debat të finalizuar me rezolutë për njohjen dhe dënimin e gjenocidit në Srebrenicë.
Si dhe pohoi se shumë shpejt do të veprohet po njësoj edhe me gjenocidin në Kosovë.
Shehu tha se megjithëse i vonuar, ky veprim publik i Kuvendit ka rëndësi të veçantë në këto momente të vështira për Europën.
Kërkesa është firmosur dhe nga ish-kryeministri Sali Berisha.
“Për njohjen dhe dënimin e gjenocidit të Srebrenicës, Bosnje Hercegovinë. Shumë shpejt edhe për gjenocidin serb në Kosovë.
Dorëzohet në Kryesinë e Kuvendit kërkesa për mocion me debat të finalizuar me Rezolutë.
Megjithëse i vonuar, ky veprim publik i Kuvendit do të kishte një rëndësi të veçantë, në këto momente të vështira për Europën, me pasoja destabilizuese në rajonin tonë, që vënë në rrezik paqen, bashkëjetesën, e rrugën tonë të integrimit. Të kujtosh krimet e së kaluarës, të dënosh ato, të kërkosh falje nga autorët, është një domosdoshmëri për mos përsëritjen e tyre.
11 Korriku kërkohet të shpallet si dita e përkujtimit të atij gjenocidi. Pikërisht nën këtë optikë, shumë shpejt do të procedohet me një iniciativë tjetër të ngjashme, për të njohur e dënuar publikisht e zyrtarisht edhe gjenocidin serb në Kosovë”,tha ai.
