Një viktimë dhe një të plagosur ka lënë pas atentati me armë zjarri në Shkodër këtë mëngjes.
Naim Bajri 68 vjeç, mbeti i vrarë ende në rrethana të paqarta, ndërsa policia bën me dije se i plagosur ka mbetur shtetasi Astrit Zeneli, 58 vjeç, jashtë rrezikut për jetën.
Sakaq, bëhet me dije se në lagjen “Guerrile” është gjetur i djegur një automjet, që dyshohet të jetë përdorur nga autorët.
Njoftimi i Policisë:
Shkodër/Informacion paraprak
Rreth orës 07:20, në vendin e quajtur “Merkata e Rusit”, në lagjen “Partizani”, Shkodër, në rrethana ende të paqarta, është vrarë me armë zjarri shtetasi N. B., 68 vjeç, banues në fshatin Dobraç, Shkodër dhe ka mbetur i plagosur lehtë, jashtë rrezikut për jetën, shtetasi Astrit Zeneli, 58 vjeç, banues në fshatin Dobraç, Shkodër.
Gjithashtu në livadh, në lagjen “Guerrile”, Shkodër, është gjetur i djegur një mjet që dyshohet të jetë përdorur nga autorët.
Janë ngritur pika kontrolli dhe po vijon krehja e zonës nga Policia vendore dhe FNSH Shkodër, si dhe janë nisur në drejtim të Shkodrës, grupe të RENEA-s.
Grupi hetimor, nën drejtimin e Prokurorisë, po vijon punën për zbardhjen dhe sqarimin e plotë të rrethanave të ngjarjes, identifikimin dhe kapjen e autorëve.
