Presidenti Ilir Meta ka qenë këto ditë në New York, ku dhe ka marrë pjesë në ceremoninë e 110 vjetorin e themelimit të Federatës Pan-Shqiptare “Vatra”.
Sipas Metës, 110 vite nga themelimi i saj, pozita e kombit shqiptar është më e mirë se ndonjëherë më parë dhe për këtë Meta thekson se Vatra ka meritat dhe kontributet e patjetërsueshme.
Postimi i plotë:
Shumë i lumtur të ndodhem në New York, mes qindra bashkëkombasve nga të gjitha trevat shqiptare, për të festuar me madhështinë që meriton, 110-vjetorin e themelimit të Federatës Pan-Shqiptare “Vatra”, historinë më të suksesshme të organizimit të shqiptarëve jashtë vendit.
Përmes veprimtarisë patriotike, kombëtare dhe diplomatike, “Vatra”, që ditën e parë u bë promotore e lëvizjeve kombëtare dhe e shpalljes së pavarësisë, për të patur më pas ndikim të jashtëzakonshëm në ruajtjen e integritetit dhe sovranitetit të Shqipërisë.
Gjatë diktaturës komuniste “Vatra” ishte shtëpia e shqiptarëve ku diskutohej për fatet e kombit, për lirimin dhe demokratizimin e Shqipërisë, por edhe për lirinë e shqiptarëve në ish-Jugosllavi e sidomos për Kosovën.
Sot, 110 vite nga themelimi i saj, pozita e kombit tonë është më e mirë se ndonjëherë më parë dhe për këtë ka meritat dhe kontributet e patjetërsueshme edhe “Vatra”.
Secili ‘vatran’ dhe shqiptar i SHBA meriton mirënjohje të veçantë për kontributin e dhënë për çështjen shqiptare.
Gëzuar 110-vjetorin e krijimit të “Vatrës!
Zoti e bekoftë Kombin tonë dhe miqësinë shqiptaro-amerikane!
