Procesi me Bullgarinë po udhëhiqet nga ekipet MPJ-së dhe se për momentin nuk ka ndonjë propozim të pranuar, njoftoi sot kryeministri i Maqedonisë së Veriut Dimitar Kovaçevski.
“MPJ me ekipet e saj të ekspertëve po bisedon me MPJ e Bullgarisë. Për momentin kur të ketë propozim të pranuar nga të dyja palët, atëherë do të dorëzohet në institucionet e Maqedonisë së Veriut, por për momentin nuk kemi një propozim të tillë”, tha Kovaçevski.
Kryeministri Dimitar Kovaçevski në një konferencë për media në Bruksel pas samitit BE-Ballkani Perëndimor e hodhi poshtë propozimin e presidencës franceze si të papranueshëm në formën e tanishme, me mundësi që bisedimet të vazhdojnë nëse bëhen ndryshime të pranueshme.
Një ditë më parë komisioneri i zgjerimit Oliver Varhelyi tha se Bullgaria e ka hequr veton dhe se tani shumë shpejt do të mbahet takimi ndërqeveritar për nisjen e negociatave.
