Presidenti rus Vladimir Putin ka paralajmëruar se Rusia sapo ka filluar në luftën e saj me Ukrainën, pavarësisht se konflikti është zvarritur për mbi 130 ditë dhe forcat e Moskës kanë pësuar viktima të rënda.
Por pavarësisht këtij paralajmërimi të cmendur Vladimir Putin tha se vendi i tij është i hapur për bisedime paqeje, por negociatat me Ukrainën do të bëhen më të vështira me kalimin e kohës.
“Ne nuk i refuzojmë negociatat e paqes, por ata që refuzojnë duhet ta dinë se sa më shumë kohë të humbasin, aq më e vështirë do të jetë për ta të negociojnë me ne”, citoi agjencia e lajmeve Xinhua të ketë thënë Putin gjatë një takimi me udhëheqësit e Dumës së Shtetit dhe krerët e fraksioneve partiake.
Associated Press raportoi se presidenti rus ka thënë se “Perëndimi dëshiron të na luftojë deri në ukrainasin e fundit”.
“Është një tragjedi për popullin ukrainas, por duket se po shkon në atë drejtim,” tha Putin. “Të gjithë duhet ta dinë se në masë të madhe, ne nuk kemi filluar ende asgjë seriozisht,” shtoi ai.
Sipas AP, Putin shtoi se një refuzim i vazhdueshëm për t’iu nënshtruar bisedimeve të paqes do ta bënte më të vështirë për Ukrainën arritjen e një marrëveshjeje me Rusinë.
“Ne po dëgjojmë se ata duan të na mposhtin në fushën e betejës,” shtoi Putin, duke iu referuar Ukrainës. “Lërini të provojnë.”
Paralajmërimi i Putinit për Ukrainën dhe Perëndimin vjen një javë pasi presidenti ukrainas Volodymyr Zelenskyy kërkoi që Rusia të përjashtohej nga Kombet e Bashkuara, duke e quajtur atë një shtet “terrorist” .
Presidenti tha se Perëndimi ka qenë jashtëzakonisht agresiv ndaj Rusisë për dekada.
“Propozimet tona për të krijuar një sistem sigurie të barabartë në Evropë u refuzuan. U hodhën poshtë iniciativat për punë të përbashkët për problemin e mbrojtjes raketore. Paralajmërimet për papranueshmërinë e zgjerimit të NATO-s nuk merren parasysh”, shtoi ai.
Përpjekjet e vendeve perëndimore për të vendosur një rend të ri në botë janë të destinuara të dështojnë, tha presidenti.
