Deputetja e PD, Ina Zhupa në Kuvend ka kërkuar që të bëhet një ndryshim në hartën e re gjyqësore.
Sipas saj Gjykata Administrative e Shkallës së Parë të ketë seli qytetin e Vlorës jo të Lushnjes pasi të gjitha rrethet (Berat, Fier, Gjirokastër, Sarandë dhe Vlorë) do ta kenë më afër. Sakaq shtoi se harta e re gjyqësore nuk mund të krijojë Lushnjen si qendër por Vlora, pasi ka të njëjtën largësi me të gjitha pikat e rrethit.
“Lushnja është skaji më verior i rajonit të krijuar nga harta gjyqësore. A nuk do të ishte më normale të ishte në qendër të këtij rrethi dhe i bie të jetë Vlora. Vlora ka të njëjtën largësi distance nga të gjitha pikat e rrethit. Duke zgjedhur skajin më verior, Lushnjen, imagjinoni Konispolin e Përmetin që shkojnë në Lushnje. Nuk e di nëse do të mund të bëjnë ndryshim por Vlora ka mundësitë për të qenë Gjykatë Administrative e Shkallës së Parë, ka edhe godinën me standardet evropiane”, tha ajo.
