Champions League nis në fazën finale, me shortin më të shumëpritur të çdo vere, atë të fazës së grupeve. 32 skuadrat e kualifikuara do të ndahen në tetë grupe me nga katër, në të cilat, dy të parat do të kalojnë në fazën e 1/16-ve për të luajtur në raundet e eliminimit.
Shorti do të hidhet këtë të enjte, më 25 gusht, në orën 18:00, në qytetin e Stambollit, ku do të luhet edhe finalja e këtij sezoni për Champions League. Në të do të përfshihen 26 skuadrat e kualifikuara automatikisht, si dhe gjashtë fitues të raundit të ‘play-off’-it, që do të konfirmohen më 23-24 gusht. Pra në total, 32 ekipe.
Këto grupe do të ndahen në katër vazo, ku në të parën do të jenë nga kampionët në fuqi të Champions League dhe fituesi i Europa League, si dhe kampionët e gjashtë vendeve me koeficientin më të lartë në Europë. Pra, në Vazon 1 do të jenë: Real Madrid (ESP), Eintracht Frankfurt (GER), Manchester City (ANG), AC Milan (ITA), Bayern Munich (GER), Paris Saint-Germain (FRA), Porto (POR), Ajax (NED)
Në vazot 2 deri në 4 do të jenë skuadra në vartësi të renditjes së koeficientit të klubit. Në rastin e federatave me dy përfaqësues, klubet do të çiftohen për të shpërndarë ndeshjet e tyre, mes të martës dhe të mërkurës. Në rastin e federatave me katër përfaqësues, do të bëhen dy çiftime. Këto do të kryhen në bazë të audiencës televizive. Asnjë ekip nuk mund të luajë kundër një ekipi nga e njejta federatë. Çdo kufizim tjetër do të njoftohet përpara shortit.
Vazo 2 do të përbëhet nga: Liverpool (ANG), Chelsea (ANG), Barcelona (ESP), Juventus (ITA), Atletico Madrid (ESP), Seville (ESP), RB Leipzig (GER) Tottenham Hotspur (ENG).
Në Vazon 3 dhe 4 do të jenë: Borussia Dortmund (GER), Salzburg (AUT), Shakhtar Donetsk (UKR), Inter (ITA), Napoli (ITA), Sporting CP (POR), Bayer Leverkusen (GER), Olympique Marseille (FRA), Bruges (BEL), Celtic (SCO), të cilave do t’u shtohen edhe gjashtë skuadrat e tjera që do të dalin nga ndeshjen e ‘play-off’-it.
Kalendari i ndeshjeve në fazën e grupeve të Champions League do të jetë:
Dita e parë: 6/7 shtator
Dita e dytë: 13/14 shtator
Dita e tretë: 4/5 tetor
Dita e katërt: 11/12 tetor
Dita e pestë: 25/26 tetor
Dita e gjashtë: 1/2 nëntor
