Shkëlqim Kameri, autori i fundit i përdhunimit të të miturës është dorëzuar në polici nga babai i tij. Kameri dyshohet se është një nga 5 të rinjtë që kanë përdhunuar 11-vjeçaren në Prishtinë.
I riu mësohet se po merret në pyetje nga policia e Kosovës. Në një prononcim për Gazeta Sinjali, babai i tij, tha se i biri s’ka qenë djalë problematik, duke ia hedhur fajin shoqërisë së tij, teksa theksoi se nuk do gjejë avokat për 19-vjeçarin.
“Ma mirë mos qofsha hiç, më mirë me më mbyt mua, mos me qenë gjallë se që jam prind. Unë vetë e kam dorëzuar Shkëlqimin në Polici. Ai s’ka qenë djalë problematik, i urtë, punëtor, e morën në qaf tjetër kush, e na morën në qafë edhe neve, tri shtëpi na kanë blloku krejt. Mos vet. S’kam për t’i gjetur avokat, me çfarë ta paguaj, punët ligsht. Me një rrogë 8 anëtarë”, tha ai.
Ndërsa rrëfeu se familja nuk e dinte se ku ishte i biri. Ai rrëfeu se doli ta kërkonte vetë dhe e gjeti në Koliq.
“Ma mirë me qenë i vdekur, se i gjallë. Shkëlqimi s’ka qenë në shtëpi, se kam ditur ku është. Unë vetë e kam dorëzuar në Polici. Në Koliq e kam takuar. Kemi dalë me ta kërkojmë edhe na ka dalë në udhë përpara”, përfundoi babai i 19-vjeçarit.
Sjellim në vëmendje se ngjarja e rëndë ka ndodhur fillimisht në parkun e Dragodanit në Prishtinë, për të vazhduar më pas në një vendndodhje tjetër të panjohur. Sipas dyshimeve të para, fillimisht tre të miturit, G.Rexhepi, Xh.S. dhe G.J., përdhunuan vajzën e mitur, në lagjen Arbëria, në Prishtinë.
Më pas aty shkoi edhe 26-vjeçari Ekrem Rexhepi, i cili është telefonuar nga vëllai i tij G. Rexhepi.
26-vjeçari raportohet se ka shkuar deri aty me makinën e tij dhe ka futur në automjet vajzën 11-vjeçare, si edhe ka marrë vëllain dhe dy të miturit e tjerë të dyshuar.
Rrugës, te varrezat dyshohet se ka zbritur nga mjeti G. Rexhepi dhe i mituri Xh. S. Ndërsa Ekremi ka vazhduar rrugëtimin me të miturin tjetër G.J., drejt një vendndodhje të panjohur.
26-vjeçari dyshohet se ka ndaluar makinën dhe e ka përdhunuar 11-vjeçaren. Për të mos mbaruar me kaq kjo ngjarje e rëndë, Ekremi ka telefonuar të dyshuarin e pestë, Shkëlqim Kamerin, i cili po ashtu dyshohet se abuzoi me të miturën.
