Të gjithë shqiptarët që duan të punojnë si shoferë në Itali, tani nuk do të kenë nevojë që të bëjnë një kurs në shtetin përtej Adriatikut, pasi patenta e marrë në Shqipëri, do të ketë vlerë edhe aty.
Sipas informacioneve zyrtare, kanë përfunduar tërësisht procedurat e brendshme nga pala italiane, lidhur me marrëveshjen për njohjen e ndërsjellë të lejeve të drejtimit mes Shqipërisë dhe Italisë.
Mësohet se kjo marrëveshje, e cila është miratuar kohë më parë nga qeveria shqiptare, do të hyjë në fuqi pas 60 ditësh, më konkretisht më datë 12 korrik 2021, koha e përcaktuar me ligj pas publikimit në fletoren zyrtare.
Marrëveshja për njohjen e ndërsjellë të lejeve të drejtimit mes dy vendeve u dakortësua më 12 mars gjatë vizitës së Ministres për Evropën dhe Punët e Jashtme, Olta Xhaçka, në Itali.
Ndërsa më datë 17 mars, marrëveshja u firmos në Tiranë mes Ministres Xhaçka dhe Ambasadorit italian në Shqipëri, Fabrizio Bucci.
/Priza.al/
