Një pjesëtar i mafias italiane është ekstraduar nga Spanja në Itali. Ai kontrollonte rrugët e kokainës brenda Europës. 35-vjeçari, Giuseppe Romeo mbërriti në aeroportin Fiumicino nga Barcelona të premten mbrëma, pas arrestimit të tij më 11 mars përmes një urdhër-arresti evropian, tha policia në një deklaratë. Ai akuzohet si anëtar i lartë i një rrjeti ndërkombëtar droge të drejtuar nga “Ndrangheta” me qendër në zonën e Kalabrisë në Itali. Ndrangheta është grupi mafioz më i fuqishëm i Italisë, i përfshirë në pothuajse të gjitha fushat e veprimtarisë kriminale, operacionet e të cilit shtrihen në të gjithë Evropën dhe më gjerë.
Sipas një deklarate të policisë italiane, Romeo, “kishte rolin e promovuesit, organizatorit dhe financuesit të trafikimit të kokainës në Evropë”. Në vitin 2018, ai arriti t’i shpëtonte operacionit të kryer nga autoritetet italiane, gjermane, holandeze dhe belge që kishte në shënjestër rreth 90 persona të dyshuar për përfshirje në rrjetin ndërkufitar të drogës dhe pastrimit të parave.
Në nëntor, Romeo u dënua në mungesë me 20 vjet burg për akuza në lidhje me trafikun ndërkombëtar të drogës, pjesëmarrje në organizatë mafioze, posedimin e drogës dhe pastrimin e parave.
