Lojtarët shqiptarë kanë ulje-ngritjet e tyre kur është puna e vlerësimit të kartonit në treg, apo dhe për paraqitjet që bëjnë me skuadrat e tyre në Europë. Zakonisht rriten në vlerë të rinjtë e bien veteranët dhe kjo duket se ka ndodhur edhe me kuqezinjtë këtë sezon. pak a shumë janë zbuluar shifrat e secilit në treg.
Këtë na e mundëson faqja e njohur “Transfermarkt”, e cila tashmë është specialiste për vlerat e kartonit të futbollistëve. Vëzhgimi i “Panorama Sport” përkon me listën dhe vlerën e kartonit për futbollistët e Kombëtares, që në harkun kohor të një viti ka pësuar shumë ndryshime, teksa emra të rinj kanë ngjitur shkallët në këtë renditje. Nëse pak kohë më parë në majë ishte mbrojtja, tani shohim që Armando Broja ka kaluar në krye.
Sulmuesi vlerësohet me 22 milionë euro, 20 fish më shumë se 2 vite më parë. Por, Kumbulla i Romës që mbante fronin, tani është në vendin e tretë me 16 milionë euro dhe sipër tij mbetet Gjimshiti me 17. Të dy mbrojtësit kanë pësuar një rënie në vlerën e tyre. Në vend ka mbetur Nedim Bajrami, i cili mban vlerën 10 milionë euro, ndërsa në këtë shifër i është bashkëngjitur Kristjan Asllani, i cili u transferua tek Interi. 27- vjeçari Tomas Strakosha vijon listën me kartonin që i vlen 7 milionë euro dhe pas tij Hysaj dhe Çekiçi me nga pesë. Ky i fundit ka pësuar një rritje me 3 mln euro. I radhës vjen nga Spanja me Keidi Baren që i vlen kartoni 4 mln, ndërsa Vrioni i transferuar në SHBA 3.5.
Qazim Laçi, i cili po luan në elitën franceze vlerësohet 3 milionë, ndërsa po aq sa ai edhe Myrto Uzuni. Më tej, lista vijon me Balliun, Ismajlin, Manajn, Muçin dhe më pas renditen edhe të tjerët. Duhet thënë se kalimi i disa lojtarëve në Premier League ua ka rritur shumë vlerat atyre dhe kjo është evidente edhe në planin financiar të pagesës e vlerës së kartonit në treg.
