Kur ka filluar prej disa javësh në vend sezoni i korrje-shirjeve për kanabisin e ri, dhe kur qielli i Shqipërisë ka nisur të mbushet plot me aeroplanë ‘të veckël’ (jo të NATO-s), policia e Fierit bëri një gabim pa dashje.
Gjatë një patrullimi rutinë të një patrulle policore u pikas një i ri i armatosur me një pushkë automatike kallashnikov, i cili në rezistencë e sipër është plagosur nga efektivët e policisë.
I riu që më vonë u zbulua se ishte roje i një plantacioni me hashash, quhet Greseld Shpataraku, dhe nga përplasja me Policinë është dërguar për në spital.
Forca të shumta të policisë së rendit, repartit Shqiponja dhe FNSH-së, ndodhen në vendin ku u gjet lënda narkotike e mbjellë në kubikë dhe ndodhi përplasja me armë e policisë dhe 29-vjeçarit nga Patosi, Greseld Shpataraku.
Uniformat blu po bëjnë krehjen e zonës, ndërsa në terren ndodhen krerët më të lartë të drejtorisë së Policisë së Fierit.
Menjëherë pas ngjarjes, SHÇBA në bashkëpunim me prokurorinë e Fierit po kryejnë hetimin për grupin që zhvillonte kontrollin rutinë në territor, i cili zbuloi dhe lëndën narkotike të mbjellë në kubikë për të parë edhe dinamikën e ngjarjes.
29-vjeçari aktualisht ndodhet në reanimacionin e spitalit të Fierit, nën kujdesin e mjekëve.
Fier/Informacion paraprak
“Në zbatim të planit të masave për kontrollin e territorit, me qëllim parandalimin e kultivimit të bimëve narkotike, grupi i kontrollit të territorit, i përbërë nga punonjës të Policisë të Komisariatit të Policisë Fier, gjatë kontrollit të territorit, në një zonë të pyllëzuar të fshatit Gjorgoz të Njësisë Administrative Cakran të bashkisë Fier, ka konstatuar një person që mbante në dorë një armë zjarri kallashnikov.
Punonjësit e Policisë i kanë bërë thirrje personit që të hidhte armën dhe mos të lëvizte, por shtetasi ende i paidentifikuar nuk i është bindur urdhrit të Policisë dhe ka drejtuar armën e zjarrit nga punonjësit e Policisë, duke e mbushur atë me qëllim që të qëllonte në drejtim të tyre.
Shërbimet e Policisë kanë ndërhyrë për ta neutralizuar dhe për pasojë shtetasi ka mbetur i plagosur, për momentin jashtë rrezikut për jetën.
Nga këqyrja e vendit të ngjarjes rezultoi se në afërsi të vendit ku u konstatua shtetasi me armë kishte dhe fidanë cannabis sativa të kultivuar në kubikë.
Në cilësinë e provës materiale është sekuestruar edhe arma e zjarrit kallashnikov. Në drejtim të vendngjarjes ka shkuar grupi hetimor, i cili në bashkëpunim edhe me SHÇBA, nën drejtimin e Prokurorisë, vijon punën për zbardhjen e plotë të rrethanave të ngjarjes dhe identifikimin e personit”.
/Priza.al/
