Mund të mos e dinit, por automjetet tuaja janë një “fole” e rehatshme për zvarranikët dhe brejtësit. Këta të fundit janë edhe një arsye më shumë se përse gjarpërinjtë “infiltrohen” drejt automjeteve.
Brejtësit zakonisht e adhurojnë aromën e vajrave lubrifikantë të makinës dhe atë të karburantit, në një kohë që gominat dhe copat plastike të tubave të motorit, janë një ushqim i lezetshëm i minjve.
Por nëse shkoni të vizitoni parqe natyrore, apo me automjetin tuaj shëtisni shumë dhe parkoni nëpër natyrë, herë pas here për siguri bëni mirë që t’i hidhni një sy edhe nga poshtë.
Gjarpërinjve u duket një objekt i lezetshëm autovetura (parë nga poshtë), sidomos nëse në të nuhasin aromën e ndonjë miu që ka qenë më parë aty. Ndaj dhe nuk ngurojnë që të futen brenda saj.
Por kjo që po u tregojmë tani është pak përtej imagjinatës…
Një ngjarje e frikshme është regjistruar ditën e sotme në Antalia të Turqisë dhe jo në mes të një pylli.
Mediat lokale kanë shkruar se një gjarpër i gjatë afërsisht 1 metër u përpoq të hynte brenda kabinës së një autoveture nëpërmjet dritares së makinës, pasi kishte rënë më parë mbi kofano nga një tabelë e lartë autostradale.
Zvarraniku helmues pasi kishte rënë mbi makine kishte rrëshqitur drejt pasqyrës, ku dhe ishte mbështjellë fort me bishtin e tij, e më pas me instiktin për të shpëtuar, po orvatej që të strehohej brenda kabinës nga dritarja që fatmirësisht ishte e mbyllur.
Shoferi dhe miku i tij me të cilin po udhëtonte, e vunë re gjarprin dhe e filmuan menjëherë, ndërsa zvarraniku tentonte të gjente të çarën e “shpresës” dhe të hynte brenda kabinës ku ndjehej më i sigurt nga era e fortë, pasi makina ishte në ecje me shpejtësi.
Ngjarja interesante ndodhi në autostradën “Antalya Gazi” në mesditë. Por fati i drejtuesit të autoveturës dhe pasagjerit, mund të kishte qenë krejt ndryshe nëse xhami do të ishte i hapur…
Ndaj bëni kujdes kur udhëtoni me autoveturë, sidomos tani që ka nisur sezoni i ngrohtë dhe gjarpërinjtë sapo kanë dalë nga letargjia.
/Priza.al/
