Reperi i njohur Kanye West ka thënë se është i hapur për t’u rikthyer në politikë, duke këmbëngulur se nuk është demoralizuar nga kandidatura e dështuar presidenciale në vitin 2020.
Së fundmi, ai deklaroi se ka synime të futet në politikë dhe me ndikimin e tij kërkon të gjejë kurën e sëmundjes së kancerit, madje do të promovojë ajrin e pastër dhe ushqimin e shëndetshëm. Babai i West luftoi me kancerin në stomak në vitin 2018, gjë e cila e shtyu reperin të punojë për të kuruar këtë lloj sëmundjeje.
Kjo nuk është përpjekja e parë e Kanye West për t’u marrë me politikë. Reperi amerikan njoftoi fushatën për të kandiduar për presidencën e Shteteve të Bashkuara në vitin 2020. Më 16 korrik 2020, fushata paraqiti një Deklaratë Kandidimi në Komisionin Federal të Zgjedhjeve.
Ai hyri në zgjedhje pasi humbi afatet e të paktën gjashtë shteteve për t’u paraqitur në fletëvotim si kandidat i palës së tretë. West përfundimisht u rendit i 4-ti (i 5-ti në Kolorado, Minesota dhe Vermont) në numërimin e votave në shtetet e tij dhe mori numrin e 7-të më të lartë të votave kombëtare për një kandidat presidencial.
