Gjatë samitit në Pragë, BE vendosi sanksione të reja tregtare ndaj Rusisë dhe zgjeroi listën e njerëzve që ngrin asetet dhe ndalon udhëtimin në territorin e BE-së si pjesë e paketës së tetë të sanksioneve që hyri në fuqi të enjten.
Sanksionet përfshijnë një embargo të plotë të importit të naftës bruto ruse nga deti, por që nuk hyn në fuqi deri në dhjetor për naftën bruto dhe në shkurt 2023 për produktet e naftës së rafinuar.
Siç ka shkruar tashmë Radio Evropa e Lirë (RSE), BE-ja nuk e përjashtoi Ballkanin Perëndimor nga masat në lidhje me naftën ruse për shkak të Serbisë.
Presidenti serb Aleksandar Vuçiç u tha gazetarëve para samitit në Pragë se ai nuk ka frikë nga “ata që kërcënojnë Serbinë për mosvendosjen e sanksioneve ndaj Rusisë dhe se përgjigja e tij ndaj liderëve evropianë do të jetë e sjellshme, e përgjegjshme, serioze dhe me ndikim të gjerë”. Ai akuzoi Kroacinë se është fajtore që Serbia nuk u përjashtua nga sanksionet për importin e naftës bruto nga Serbia këtë herë.
Në të njëjtën kohë, kryeministri kroat Andrej Plenkoviç u përgjigj se Serbia mund të importojë çdo naftë përmes Kroacisë, përderisa ajo nuk është ruse. “Të gjitha vendimet janë marrë bashkërisht (brenda BE-së) dhe Serbia nuk mund të ulet në dy karrige në këto rrethana”, tha Plenkoviç përpara samitit të Pragës.
