Fatos Gosa, Petrit Qoli dhe Agron Qoli, tre të arrestuarit nga operacioni “Plumbi i Artë” kanë kërkuar masë më të butë sigurie. Ata kanë depozituar një rekurs në Gjykatë, i cili do të shqyrtohet nga anëtari i GJKKO-së, Sokol Binaj.
Këta persona u arrestuan në kuadër të operacionit “Plumbi i Artë”, ku pas dëshmisë së dëshmitarit te drejtësisë Nuredin Dumani u zbardhën disa vrasje dhe u lëshuan plot 32 urdhër arreste.
Referuar dëshmisë së dëshmitarit të drejtësisë Gosa ka dhënë informacione mbi lëvizjet e Andi Zylyfit i ekzekutuar në Peqin, ngjarje e ndodhur në fund të vitit 2019. Ndërsa Petrit dhe Agron Qoli, sipas Dumanit, kanë marrë pjesë dhe kanë dhënë informacione mbi lëvizjet e Fatmira Dedës, vrasje e porositur nga Festim Qoli.
60-vjeçarja u ekzekutua në mënyrë tragjike, në garazhin e pallatit ku banonte.
Sipas Dumanit, vrasja u krye nga Talo Çela, ndërsa u porosit nga Festim Qoli, pasi ajo interesohej në prokurori për vrasjen e djalit të saj Ervis Deda, ngjarje e ndodhur në vitin 2012.
Sipas Dumanit, ekzekutimi i djalit të saj ishte kryer nga Henrik Hoxhaj me porosi të Festim Qolit, për shkak të një borxhi. Në ekzekutimin e 34-vjeçarit, në atë kohë Festim Qoli, i cili është në kërkim, kishte pasur rolin e shoferit. Ndërsa vrasjen e nenës së tij, e porositi pasi ajo po i hapte probleme me drejtësinë.
