Janë thyer afatet që kishin vendosur në deklaratat e tyre përfaqësuesja Ana Brnabiq dhe presidenti i Serbisë Aleksandar Vuçiq për formimin e Qeverisë së re të Serbisë.
Përfaqësuesit e qeverisë dhe opozitës në Serbi nuk pajtohen se deri në çfarë mase vendimi për sanksionet kundër Rusisë e vonon formimin e Qeverisë së re të Serbisë.
Megjithatë, ajo për të cilën bien dakord është se lufta në Ukrainë ka ndikuar që edhe tre muaj pas shpalljes së rezultateve përfundimtare të zgjedhjeve parlamentare, Serbia të mos ketë një institucion ombrellë.
“Arsyet i shoh kryesisht në faktin se ishte e nevojshme përgatitja e vendit për të gjitha gjyqet e shkaktuara nga konflikti ruso-ukrainas”, tha për Radion Evropa e Lirë Milenko Jovanov, kreu i grupit parlamentar të progresistëve në pushtet në parlament. (RSE).
Në anën tjetër, Radomir Lazoviq, anëtar i lëvizjes opozitare Ne davimo Beograd, vlerëson se për SNS vendosja e sanksioneve ndaj Rusisë është një nga arsyet pse ajo qeveri duhet të formohet sa më shpejt.
Afatet që u dhanë
Ana Brnabiq në një nga prononcimet e fundit për RTS-në më 22 shtator deklaroi se rrethanat e ngadalësuan formimin e Qeverisë dhe se shpreson që ajo të formohet në gjysmën e parë të tetorit.
“Por ju kurrë nuk e dini se çfarë do të ndodhë në rrugën tuaj,” tha ajo.
Paraprakisht, presidenti i Serbisë, Aleksandar Vuçiq, në fund të gushtit deklaroi se për rreth njëzet ditë e pret formimin e qeverisë së re .
Tre muaj më parë, në një deklaratë pas betimit, ai deklaroi fundin e korrikut si pritshmëri për qeverinë e re.
Milenko Jovanov nga SNS thekson se Qeveria do të formohet në përputhje me afatet ligjore.
Afati për formimin e qeverisë është 120 ditë nga shpallja e rezultateve përfundimtare të zgjedhjeve. Ky afat skadon për rreth njëzet ditë.
Thirrje për vendosjen e sanksioneve
Ndërkohë, Serbia po përballet me thirrje nga zyrtarë perëndimorë për të vendosur sanksione ndaj Rusisë për agresionin e saj kundër Ukrainës fqinje.
Në Ligjin për Qeverinë e Serbisë që në fillim thuhet se Qeveria e përcakton dhe e udhëheq politikën e Serbisë në kuadër të Kushtetutës dhe ligjit.
Për momentin, përkundër të gjitha thirrjeve, Serbia nuk ka vendosur sanksione ndaj Rusisë, edhe pse ka konfirmuar se e dënon pushtimin duke votuar për rezoluta në OKB.
Bashkimi Evropian, Shtetet e Bashkuara dhe vende të tjera perëndimore kanë vendosur sanksione ndaj Moskës në përgjigje të agresionit rus.
Se Serbia pritet të respektojë masat kufizuese të BE-së thuhet në raportin e Komisionit Evropian për progresin e vendeve kandidate për anëtarësim në BE.
RSE kishte një pasqyrë në atë raport, i cili do të publikohet më 12 tetor.
Kabineti i kryeministres Ana Brnabiq nuk ka marrë përgjigje në pyetjen e RSE-së se deri në çfarë mase sanksionet kundër Rusisë po e vonojnë formimin e qeverisë së re.
