Pasi nuk pati sukses në fushën e blertë të futbollit, ai e gjeti veten në fushën e biznesit. Rami Shaaban ishte zëvendësi i legjendarit David Seaman në ekipin fantastik të Arsenalit, që asokohe drejtohej nga i famshmi Arsene Wenger.
Një dëmtim i rëndë i pengoi karrierën në këtë skuadër, ndërkohë që gardiani gjerman Jens Lehmann i zuri vendin në klubin londinez. Si portier i dytë i ‘Topçinjve’ të Londrës suedezi luajti shumë pak dhe më pas u huazua në disa skuadra, deri sa u tërhoq nga futbolli në vitin 2011, kur ishte 36 vjeç.
Pikërisht në këtë moment do të nisë jeta e tij e dytë, madje shumë më e suksesshme se e para. Gardiani suedez Rami Shaaban hap një biznes fruta-perimesh, me mallin që e merr direkt nga Egjipti, vendin e tij të origjinës dhe e shpërndan në markete të Londrës. Nëse në futboll ishte portier i dytë apo i tretë, në këtë fushë ai është i pari dhe mjaft i suksesshëm.
