Në shenjë se pushtimet e vazhdueshme dhe të përhershme ushtarake të Ukrainës përgjatë frontit jugor po shqetësojnë Kremlinin, Moska po premton strehim falas për banorët e rajonit pjesërisht të pushtuar Kherson që duan të evakuohen në Rusi, shkruan AP.
Zëvendëskryeministri rus Marat Husnulin e njoftoi këtë pasi udhëheqësi i Khersonit, një nga katër rajonet ukrainase të aneksuar ilegalisht nga Moska muajin e kaluar dhe i mbështetur nga Rusia, i kërkoi Kremlinit të organizonte evakuimin e katër qyteteve në rajon.
“Qytetet në rajonin e Khersonit – Kherson dhe Nova Kahovka, Hola Pristanj dhe Chernobayevka – janë të ekspozuar ndaj sulmeve me raketa çdo ditë”, tha Vladimir Saldo në një video më 13 tetor.
“Këto goditje me raketa shkaktojnë dëme serioze, mbi të gjitha për banorët. Ndër objektivat e goditura nga raketat janë hotele, ndërtesa banimi, tregje [vende] ku ka shumë civilë,” tha ai.
Saldo vuri në dukje se u mor vendimi për evakuimin e banorëve të Khersonit në rajonet ruse të Rostovit, Krasnodarit dhe Stavropolit, si dhe në gadishullin e aneksuar të Krimesë.
“Unë do t’ju kërkoja të ndihmoni në organizimin e këtij procesi. Ne, banorët e rajonit Kherson, e dimë se Rusia nuk e braktis të vetën dhe Rusia gjithmonë i jep dorën,” tha Saldo.
Kërkesa e tij vjen pasi forcat ukrainase po kryejnë një kundërofensivë në rajonin jugor të Khersonit, megjithëse me një ritëm më të ngadaltë, sipas AP.
Forcat e armatosura të Ukrainës kanë raportuar fitime të qëndrueshme territoriale përgjatë frontit jugor, duke përfshirë rimarrjen e 75 vendbanimeve në rajonin Kherson gjatë muajit të kaluar, tha më 13 tetor Ministria për Riintegrimin e Territoreve të Pushtuara Përkohësisht.
Në lindje të vendit, forcat e armatosura ukrainase rimorën 502 vendbanime në rajonin e Kharkiv, 43 në rajonin e Donetsk dhe shtatë në rajonin e Luhansk, tha Ministria.
