Presidentja e Komisionit Evropian, Ursula Von der Leyen, u shpreh se BE do t’i dhurojë Shqipërisë 80 mln euro si mbështetje për krizën energjetike.
Gjatë fjalës së saj në një konferencë për mediat, Von der Leyen deklaroi gjithashtu se BE do të dhurojë edhe 500 mln euro për Ballkanin Perëndimor për modernizimin e sistemit energjetik.
“Këto janë arritje në një kohë sfidash, këtu kam parasysh luftën në Ukrainë. Rusia po shkel rendin ndërkombëtar dhe çdo Kartë të OKB-së. Fatmirësisht Shqipëria nuk ka fare varësi nga gazi rus por, natyrisht që energjia elektrike që vjen në Shqipëri ndikohet nga çmimet stratosferike në Shqipëri. Ne kemi vendosur që të jemi unitarë dhe solidarë. Pra, ne jemi pjesë e një unioni për energjinë dhe po propozojmë një paketë mbështetëse për energjinë për Ballkanin Perëndimor, për të ndikuar në zbutjen e çmimeve. Do të jenë 80 mln euro në grante. Më pas do të ketë mbështetje për sistemin e energjisë. Këtu po flasim 500 mln euro në grante për të gjithë rajonin për të investuar në infrastrukturën energjetike”, tha ajo.
