Policia e Tiranës ka kryer dy aksione anti-kontrabandë të koduara “Free road 4” dhe “Contraband 3”, gjatë 24 orëve të fundit.
Në kuadër të operacionit “Free road 4”, një 41-vjeçar u kap duke transportuar veshje kontrabandë, dhe më pas do të ua shiste tre pronarëve të dyqaneve nga Fieri, por është zbuluar nga Policia. Blutë e kryeqytetit, e arrestuan në flagrancë, bashkë me tre pronarët e bizneseve.
Po ashtu edhe në pranga përfundoi edhe një 38-vjeçar, pasi në në një ambient në pronësi të këtij personi, u zbuluan rreth 320 shishe me pije alkoolike, që dyshohen se janë kontrabanduar në vendin tonë.
Njoftimi i plotë:
Tiranë/Finalizohen brenda 12 orëve, 2 operacione policore, të koduara “Free road 4” dhe “Contraband 3”, për goditjen e kontrabandës me mallra të ndryshme.
Operacionet, nga Seksioni i Krimit Ekonomik dhe Financiar në DVP Tiranë.
✅ Operacioni “Free road 4”- U kap në flagrancë duke transportuar me autobus, veshje dhe mallra të tjera të kontrabanduara, vihet në pranga 41-vjeçari. Arrestohen edhe 3 pronarët e dyqaneve që do të merrnin mallrat e kontrabanduara, për t’i shitur në dyqanet e tyre.
✅ Operacioni “Contraband 3”- Arrestohet 38-vjeçari që mbante në një ambient në pronësi të tij, 320 shishe me pije alkoolike, të kontrabanduara.
Shërbimet e Policisë, në vijim të punës për parandalimin, evidentimin dhe goditjen e veprimtarive kriminale në fushën e kontrabandës me mallra të ndryshme, mbështetur dhe nga inteligjenca informative, kanë finalizuar brenda 12 orëve, 2 operacione policore, në kuadër të të cilëve janë arrestuar në total, 5 shtetas.
Në kuadër të operacionit policor të koduar “Free road 4” u bë arrestimi në flagrancë i shtetasve:
– A. S., 41 vjeç, banues në Fier;
– Y. D., 47 vjeç, I. Q., 46 vjeçe dhe E. D., 30 vjeçe, të tre banues në Fier, administratorë të tre subjekteve tregtare.
Shërbimet e Policisë, në afërsi të TEG-ut, kanë lokalizuar dhe ndaluar autobusin me drejtues shtetasin A. S. Gjatë kontrollit në autobus, u gjetën dhe u sekuestruan në cilësinë e provës materiale, mallra dhe veshje të dyshuara të kontrabanduara në vendin tonë, të cilat do t’i merrnin shtetasit Y. D., I. Q., dhe E. D., me qëllim shitjen në aktivitetet tregtare përkatëse.
——
Në kuadër të operacionit policor të koduar “Contraband 3” u bë arrestimi në flagrancë i shtetasit:
– Xh. T., 38 vjeç, banues në Zall Herr. Shërbimet e Policisë, gjatë kontrollit në një ambient në pronësi të këtij shtetasi, në Babrru, kanë gjetur dhe sekuestruar në cilësinë e provës materiale, rreth 320 shishe me pije alkoolike, që dyshohen se janë kontrabanduar në vendin tonë.
Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.
