Ushtruesi i detyrës së Drejtorit të Përgjithshëm të Policisë së Kosovës ka shkarkuar drejtorin e Policisë për Rajonin e Veriut, Nenad Gjuriq, me propozim të Inspektoratit Policor të Kosovës, për shkak të refuzimit të zbatimit të vendimeve zyrtare, njoftoi Policia e Kosovës më 3 nëntor.
Policia e Kosovës do të vazhdojë me obligimet e saj në zbatimin e detyrave dhe kompetencave ligjore, profesionalisht dhe në shërbim të vendit dhe të gjithë qytetarëve pa dallim”, thuhet në njoftim, duke shtuar se veprimet e punonjësve janë në kundërshtim me dispozitat ligjore dhe udhëzimet administrative e Policisë së Kosovës nuk do të tolerohen.
Një ditë më parë, më 2 nëntor, Gjuriq njoftoi se policët e komunitetit serb nuk do të paralajmërojnë pronarët e veturave me targa KM (Mitrovica e Kosovës).
Pak orë më parë, Inspektorati Policor i Kosovës (IPK) rekomandoi shkarkimin e drejtorit policor për rajonin verior, i cili nuk e zbatoi vendimin e Qeverisë së Kosovës për paralajmërimin e pronarëve të veturave me targa KM (Kosovska Mitrovica).
Shpërndarja e paralajmërimeve për pronarët e veturave me tabela të qyteteve të Kosovës, të lëshuara nga Serbia, është pjesë e planit të Qeverisë së Kosovës për riregjistrimin në targa RKS (Republika e Kosovës).
Është planifikuar që ky plan të realizohet me ndihmën e Policisë së Kosovës në tri faza nga 1 nëntori deri më 21 prill 2023.
Në fazën e parë shoferët duhet të paralajmërohen, në të dytën mund të paguajnë gjoba prej 150 euro, ndërsa në të tretën do të lëshohen targa.
Megjithatë, Gjuriq tha se oficerët e policisë serbe nuk mund ta zbatojnë atë sepse “ajo është politike dhe e drejtuar kryesisht kundër komunitetit serb”. Ai shtoi se “patrulla të njësive të komunikacionit nga Prishtina janë dërguar në veri, për të ushtruar presion”.
Shenjat e regjistrimit të qyteteve në Kosovë si KM janë të paligjshme për Kosovën, por deri më tani ato janë toleruar vetëm në komunat në veri, ku jeton popullata shumicë serbe.
Këtë vendim të policëve në veri e ka përkrahur lista Srpska, partia udhëheqëse e serbëve, e cila ka mbështetjen e Beogradit.
Shtetet e Bashkuara dhe Bashkimi Evropian i kanë kërkuar sërish Kosovës që ta shtyjë këtë çështje edhe për dhjetë muaj të tjerë. Nga ana tjetër, Beogradi zyrtar po kërkon marrëveshje për këtë çështje, pra kthimin në përdorim të tabelave KS neutrale nga statusi.
