Më 7 nëntor, zyrtarët serbë në veri të Kosovës kanë vazhduar dorëheqjen e tyre pranë institucioneve të Kosovës, në shenjë pakënaqësie me planin e Qeverisë së Kosovës për të riregjistruar veturat me targa serbe.
Dhjetë anëtarë të Listës Serbe, partisë më të madhe të serbëve në Kosovë, kanë dorëzuar të hënën dorëheqjet në Kuvendin e Kosovës, tha për Radion Evropa e Lirë, Ilir Kirçeli, shef i kabinetit të kryetarit të Kuvendit, Glauk Konjufca.
“Në mëngjes jam njoftuar nga administrata se deputetët serbë kanë dorëzuar mandatet – dorëheqjet”, ka thënë shkurt Kerçeli.
Edhe gjyqtarët dhe punonjësit administrativë serbë në Mitrovicën e Veriut dhanë dorëheqje mëngjesin e 7 nëntorit. Në gjykatën e këtij qyteti ishin gjithsej 19 gjyqtarë serbë.
Anëtari i Këshillit Gjyqësor të Kosovës, Nikola Kabasic, pas daljes nga gjykata në Mitrovicën e Veriut tha se “ky është fundi”.
“Ky është realizimi i njoftimit që kam bërë dy ditë më parë. Sot, gjyqtarët që nuk erdhën dje për të dërguar dorëheqjet në Këshillin Gjyqësor të Kosovës, e bënë këtë nga emailet zyrtare. Kolegët tanë, gjyqtarët dhe punonjësit administrativë shqiptarë, mbeten në gjykatë dhe i gjithë stafi administrativ dhe gjyqtarët serbë kanë dhënë dorëheqje”, tha Kabashiq, duke shtuar se tani presin një mënyrë për ta shlyer borxhin me lëndë dhe pajisje. dhe në emër të tij konfirmoi se nuk do të ketë më kthim në institucione pavarësisht nga zhvillimi i situatës.
