Sot në Bangkok, presidenti francez Emmanuel Macron u bëri thirrje vendeve të Azi-Paqësorit që t’i bashkohen “konsensusit në rritje” kundër luftës në Ukrainë, duke theksuar se lufta është gjithashtu “problemi i tyre”.
“Prioriteti numër një i Francës është të kontribuojë për paqen në Ukrainë dhe të përpiqet të krijojë një dinamikë globale për të ushtruar presion mbi Rusinë”, tha Macron në samitin e liderëve të Bashkëpunimit Ekonomik Azi-Paqësor (APEC).
Macron tha se Franca dëshiron një bashkëpunim shumë të ngushtë me vende të ndryshme si Kina, India, vendet e Lindjes së Mesme, Afrika, Amerika Latine, për të krijuar një konsensus në rritje.
Sipas tij, edhe ato vende duhet të thonë se lufta në Ukrainë është problem i tyre sepse krijon destabilizimin.
“Na ndihmoni t’i dërgojmë një mesazh Rusisë – ndaloni luftën, respektoni rendin ndërkombëtar, kthehuni në tryezën (bisedimeve),” shtoi Macron, sipas Beta të AFP.
Samiti i APEC filloi sot në Bangkok në dritën e luftës në Ukrainë dhe lëshimit të raketave balistike nga Koreja e Veriut.
Është takimi i parë i drejtpërdrejtë i liderëve të APEC që nga viti 2018.
Pak para fillimit të samitit, Pheniani lëshoi një raketë tjetër, e cila besohet të ketë rënë në det brenda zonës ekskluzive ekonomike të Japonisë, tha kryeministri japonez Fumio Kishida.
