Një aksident ka ndodhur gjatë mbrëmjes së sotme në rrugën nacional Berat- Lushnjë, në “Rotondon e Moravës”, ku një makinë tip Mercedez Benz është përplasur me trafikandarëse
Si pasojë e përplasjes së fortë mjeti është shkatërruar. Por diçka misterioze ka ndodhur pas aksidenti.
U mësua se pas përplasjes mjeti është braktisur në rrugë dhe nuk dihen ende shkaqet e braktisjes dhe kush ka qënë në drejtimin e tij.
Burimet policore bëjnë me dije se pas mbërritjes së policisë në vendngjarje mjeti u gjet i braktisur dhe dhe me dyer të hapura.
Policia ka rrethuar menjëherë perimetrin dhe po punon për identifikimin e shoferit, ndërkohë që një grup ekspertësh është duke ekzaminuar mjetin nga brenda pasi nuk mund të shpjegohet braktisja e mjetit pas përplasjes.
Burime nga vendngjarja bëjnë me dije se mjeti rezulton i marrë me qira në qytetin e Durrësit por ende nuk dihet identiteti i shoferit.
Të njëjtat burime konfirmojnë se dëshmitarët në vendngjarje kanë deklaruar se pas përplasjes, nga mjeti kanë dalë shoferi dhe një pasagjer, të cilët janë larguar me vrap nga vendngjarja.
Nuk dihen ende arsyet e largimit të dy shtetasve nga mjeti. Ndërkohë që nga Spitali Rajonal Berat konfirmohet se nuk ka mbërritur asnjë i plagosur apo i lënduar.
/abcnews.al/
