Të hënën, më 28 nëntor, Bashkimi Evropian i dha vetes kompetenca ligjore për të marrë masa kundër kujtdo që ndihmon Rusinë të shmangë sanksionet e saj, njoftoi BE të hënën.
Sipas deklaratës, shtetet anëtare ranë dakord njëzëri se shkelja e masave kufizuese ndaj Rusisë konsiderohet një “krim” në të gjithë bllokun.
Kjo do ta bënte më të lehtë shtimin e individëve dhe subjekteve nga vendet jashtë BE-së në listat e sanksioneve të krijuara për të ndëshkuar veprimet ekzistuese siç është pushtimi i Rusisë në Ukrainë, sipas Agence France-Presse (AFP).
Kjo do të ndihmonte në standardizimin e interpretimit dhe zbatimit të ligjit të sanksioneve të BE-së në të gjithë Bashkimin 27-anëtarësh.
“Aktualisht, vendet anëtare kanë përkufizime të ndryshme se çfarë përbën shkelje të masave kufizuese dhe çfarë ndëshkimesh duhet të zbatohen në rast shkeljeje,” sipas një deklarate të lëshuar nga presidenca aktuale çeke e bllokut.
“Kjo mund të çojë në shkallë të ndryshme të zbatimit të sanksioneve dhe rrezikut të anashkalimit të këtyre masave, duke lejuar potencialisht personat e sanksionuar të vazhdojnë të kenë akses në asetet e tyre dhe të mbështesin regjimet e synuara nga masat e BE”, thuhet në deklaratë.
Pas vendimit të shteteve anëtare, autoriteti ekzekutiv i BE-së, Komisioni Evropian, do të hartojë një propozim direktivë ligjore që më pas do t’i dorëzohet shteteve anëtare dhe Parlamentit Evropian.
Bashkimi Evropian, së bashku me SHBA-në dhe Britaninë e Madhe, vendosën sanksione të ashpra ndaj Rusisë pas pushtimit të Ukrainës më 24 shkurt.
