Një shkollë në Turqinë perëndimore, ku shkojnë 19 nxënës, është bërë një vend i shenjtë për rreth 30 mace, pasi edhe ato ‘ndjekin mësimet’, lëvizin lirshëm nëpër ambientet e saj dhe luajnë me fëmijët gjatë pushimeve.
Alatza, Logia, Getse, Gunes, Uzum, Toshiba dhe Pantheras janë emrat e disa prej tyre. Nxënësit ndajnë klasën e tyre me macet në ndërtesën njëkatëshe ku është vendosur shkolla fillore Antagoure.
Një shkollë strehimi për macet
Shkolla, e vendosur në një rreth të Beydag të provincës së Izmirit, kishte një depo të zbrazët që tani përdoret si strehë për macet.
Mësuesja Evrim Mutluai, e cila prej rreth 16 vitesh jep mësim, e ktheu magazinë në një shtëpi komode për macet si pjesë e projektit të saj “Shkolla me putra”, që synon të rrisë interesin e nxënësve për lëndët shkollore.
“Kur erdha këtu, gjëja e parë që vura re ishte një qëndrim negativ i nxënësve ndaj shkollës, kryesisht për shkak të efekteve të pandemisë. Mendova se çfarë mund të bëja për ta. Kisha disa studentë që nuk vinin në klasë. Ne siguruam pjesëmarrjen e tyre falë lidhjes që ata krijuan me macet, kështu që ata vazhduan të vinin në shkollë”,- shprehet ajo.
Siç shpjegon ajo, projekti i ndihmon studentët të fitojnë një ndjenjë përgjegjësie, pasi ata duhet të kujdesen dhe të ushqejnë macet. Ka një lidhje shumë të fortë dashurie mes maceve dhe studentëve. Me fjalë të tjera, fëmijët që nuk donin të vinin në shkollë, filluan të vizitonin strehën edhe në fundjavë për t’u kujdesur për macet dhe për të pastruar vendin. Ata zhvilluan një qëndrim pozitiv ndaj shkollës.
Mutluai shpenzon kohë duke organizuar aktivitete në dobi të zhvillimit personal dhe social të nxënësve dhe fokusohet veçanërisht në dashurinë për natyrën dhe kafshët. “Askush nuk merr asgjë nga një fëmijë që e do natyrën dhe kafshët”,– përfundon ajo.
