Të mërkurën, më 14 dhjetor, Bundestagu gjerman filloi të punojë për një përgjigje ndaj kërcënimit të një komploti të supozuar nga një grup terrorist i lidhur me lëvizjen e ekstremit të djathtë Reichsburger që po planifikonte një grusht shteti.
Ministrja e Brendshme Nensi Faeser është planifikuar të bëjë një deklaratë mbi këtë temë në Komisionin Parlamentar të Çështjeve të Brendshme.
Mundësia e ligjeve më të ashpra për armët, të cilat Faeser njoftoi në fillim të kësaj jave, do të jetë gjithashtu në rendin e ditës, megjithëse anëtari i kabinetit, ministri i drejtësisë, Marco Buschmann, është shprehur tashmë kundër propozimit.
“Ne kemi ligje të rrepta për armët në Gjermani,” i tha Buschmann grupit mediatik RND më 14 dhjetor. “Por edhe ligjet më të rrepta të armëve nuk ndihmojnë kur njerëzit marrin armë ilegalisht. Ne duhet të bëjmë një punë më të mirë për të zbatuar ligjin tonë ekzistues.”
Megjithatë, Buschmann mbështet planin e ministrit të brendshëm për ta bërë më të lehtë largimin e nëpunësve civilë nëse ata sillen në mënyrë jokushtetuese, veçanërisht nëse kanë akses në armë.
“Ajo që është thelbësore është që ne të identifikojmë herët njerëzit me aspirata antishtetërore dhe t’i largojmë ata nga shërbimi civil,” tha ai. “Në këtë mënyrë ata nuk kanë më akses në armë. Kjo është një pikë e rëndësishme.”
Javën e kaluar, një grup terrorist i lidhur me grupin Reichsburger, ose Qytetarët e Rajhut, ishte objektiv i bastisjeve në të gjithë vendin. Grupi akuzohet se dëshiron të ndërtojë forcat e veta të armatosura për të përmbysur shtetin. Një ish-deputet, një ushtar dhe një aristokrat ishin mes dhjetëra të arrestuarve me dyshimin se ishin anëtarë të grupit.
Qytetarët e Rajhut nuk e njohin legjitimitetin e shtetit gjerman. Ata shpesh refuzojnë të paguajnë taksa ose gjoba, dhe në disa raste posedojnë armë të paligjshme.
