Këta janë disa nga librat që të burgosurit e kanë të ndaluar t’i lexojnë – dhe pse
Është fakt i vërtetuar tashmë se kultivimi i shkrim-leximit ka shumë efekte rehabilituese, kështu që për të burgosurit, leximi i librave nuk ka si të jetë diçka jo-pozitive.
E megjithatë, Rregulloret e Byrosë Federale të Burgjeve thonë se librat mund të refuzohen kur i dërgohen një të burgosuri nëse përmbajtja përbën një kërcënim për sigurinë e një institucioni ose nëse libri mund të lehtësojë aktivitetin kriminal.
Disa burgje përdorin rregulla të ashpra që kufizojnë librat që ata pretendojnë se promovojnë “kërcënim për sigurinë” dhe “materiale seksualisht eksplicite”.
Këto janë vetëm disa prej tyre:
1 – 48 Ligjet e Pushtetit nga Robert Greene
48 Ligjet e Pushtetit janë të njohura si një zgjedhje popullore leximi midis të burgosurve në sistemin e burgjeve të Shteteve të Bashkuara, si dhe personave të famshëm. Libri bestseller ofron 48 “ligje” se si të jetoni jetën tuaj dhe të fitoni vetëbesim. Greene studioi jetën e Henry Kissinger dhe P.T. Barnum dhe huazoi filozofitë e Makiavelit dhe Sun Tzu-së për të dalë me 48 parimet e tij.
Libri është po aq popullor sa ka përfunduar gjithashtu në listën e librave të ndaluar në shumë burgje amerikane.
Sistemi i burgjeve në Utah mendon se të dy librat kanë aftësinë për t’u mësuar të burgosurve se si të manipulojnë të tjerët.
2 – Instalimet elektrike të avancuara në shtëpi, redaktuar nga Black & Decker
Ky libër është, siç sugjeron dhe titulli, një manual mësimi për një elektricist amator për sa i përket përmirësimeve në shtëpi.
Ai e mëson lexuesin përmes metodave të ndryshme të instalimit të komponentëve elektrikë dhe bazave të sistemeve të instalimeve elektrike nga një llambë në një hapës të dyerve të garazhit me telekomandë. Por Departamenti i Korrigjimeve në Miçigan e sheh librin si një manual arratisjeje dhe e ka ndaluar nga burgjet e tyre që nga shkurti 2017.
3 – Zodiac i demaskuar: Zbulohet identiteti i vrasësit serial më të pakapshëm në Amerikë
Zodiac Unmasked nga Robert Graysmith është një libër i vitit 2007 që fokusohet në Vrasësin e Zodiakut, një person i paidentifikuar përgjegjës për një sërë vrasjesh që ndodhën midis viteve 1968 dhe fillimit të viteve 1970. Personi që pretendonte se ishte Zodiac tallte policinë dhe pretendoi se kishte vrarë 37 njerëz – të cilët nuk u zbuluan kurrë.
Zodiac Unmasked pretendon se identifikon Vrasësin e Zodiakut.
Departamenti i Korrigjimeve të Miçiganit e ka Zodiakun në listën e librave të tyre të ndaluar, sepse thuhet se “përshkruan udhëzime të ndryshme në kryerjen e veprimtarisë kriminale”.
4 – “Krim dhe Ndëshkim” nga Fjodor Dostojevski
Në pamje të parë ky libër duket se mund të ishte një mësim i përshtatshëm për terroristët apo kriminelët të cilët tashmë lëngojnë prapa hekurave për periudha të zgjatura ose edhe dënime të përjetshme. Historia e një krimineli të dërrmuar nga faji, i cili u dorëzohet autoriteteve për të shlyer krimin e tij, është një histori që do të dukej e mirëpritur në një burg të sigurisë së lartë si ai i Guantanamos.
Por, ndoshta frika nga ‘Krimi dhe Ndëshkimi’ ka të bëjë me filozofinë që në një pikë, Raskolnikov detyrohet të përkrahë për të justifikuar krimin e tij. Raskolnikov e sheh veten si një “supernjeri”, një epror që nuk është i limituar nga kufizimet morale të shoqërisë ku jeton. Njerëzit e zakonshëm – apo masat, që “jetojnë në bindje dhe e pëlqejnë atë” – duhet t’u binden ligjeve. Por mbinjeriu mund të bëjë ligjet e tij. Ai mund të kryejë çfarëdo krimi që dëshiron në ndjekje të objektivit të tij, edhe nëse kjo do të thotë të vrasë ata që, si personazhi i huadhënësit, sipas tij, nuk janë të dobishëm për shoqërinë.
5 – Atlas Rrugor AAA: Udhëtoni me dikë që i besoni
AAA Road Atlas: Travel With Someone You Trust u publikua në vitin 2009 dhe përmban harta për Shtetet e Bashkuara, Kanada dhe Meksikë. Libri përfshin gjithashtu këshilla të dobishme për të udhëtuar nëpër parqe kombëtare dhe zona të tjera turistike. Në qershor 2015, libri u vendos në listën e ndaluar në burgjet e Kalifornisë për shkak të rrezikut që një material i tillë mund të ndihmonte arratisjen e mundshme nga burgu.
6 – Pra, ata thonë se ju keni thyer ligjin: Sfidimi i autoritetit ligjor
‘Pra, Ata thonë se ju keni thyer ligjin: Sfidimi i autoritetit ligjor’ është një libër i botuar i vitit 2011, shkruar nga The Lioness. Objekti i librit është të ndihmojë të tjerët të fitojnë një kuptim më të mirë të ligjit, veçanërisht për ata që paraqiten në gjykatë, por mund të mos kenë akses tek një avokat.
Libri pretendon të jetë i dobishëm për qëllime mbrojtëse, apele dhe sfida. Dikush do të supozonte se një libër me këtë titull do të ishte më i dobishëm për ata që kanë shkelur ligjin, por sistemi i burgjeve të Miçiganit nuk pajtohet me këtë. Në korrik të vitit 2015, Departamenti i Korrigjimeve të Miçiganit e ndaloi librin brenda sistemit të tyre të burgjeve. Ata deklaruan se:
“[Libri] përfshin përmbajtje që mbron dhe promovon shkeljen e ligjeve shtetërore dhe federale, duke përfshirë udhëzimet për të shmangur pagimin e taksave dhe ligjet që kontrollojnë përdorimin e rrugëve dhe autostradave”.
7 – Tregtari i Venedikut nga Uilliam Shekspir
Tregtari i Venedikut është një shfaqje e Shekspirit e shekullit të 16-të ku Bassanio, protagonisti, ka nevojë për para për të vizituar Portia-n, një trashëgimtare e pasur me të cilën ai është i dashuruar. Bassanio kërkon ndihmë nga miku i tij Antonio dhe ky i fundit shkon te një huadhënës në emër të Bassanios. Huadhënësi pranon t’i japë paratë Antonios, por nëse ai i humbet si hua, Antonio do t’i detyrohet huadhënësit një paund nga mishi i tij. Antonio përfundon duke mos qenë në gjendje të paguajë huanë, por me ndihmën e Portias, ai është në gjendje të largohet, i paprekur.
Në vitin 2013, Tregtari i Venecias hyri në listën e librave të ndaluar në Gjirin e Guantanamos. Burgu nuk jep asnjë shpjegim për librat e tyre të ndaluar, vetëm një listë mjaft të vogël librash që nuk lejohen. Një arsye e diskutuar është interpretimi i mundshëm që mund t’i bëhet antisemitizmit të portretizuar në këtë libër.
j.l./ dita
