NATO njoftoi se nuk ka marrë asnjë kërkesë zyrtare nga Kosova për të shtuar numrin e ushtarëve në misionin paqeruajtës të KFOR-it, të cilin e udhëheq.
Një zyrtar i NATO-s i tha Radios Evropa e Lirë (RSE) se KFOR-i aktualisht ka kapacitetet e nevojshme për të garantuar sigurinë dhe lëvizjen e lirë për të gjithë qytetarët, bazuar në mandatin e tij.
“KFOR-i mbetet plotësisht i aftë për të përmbushur misionin e tij në përputhje me mandatin e caktuar nga Kombet e Bashkuara”, tha zyrtari i NATO-s.
Ky qëndrim pasoi thirrjen e kryeministrit të Kosovës, Albin (Albin) Kurti, i cili kërkoi që NATO të rrisë numrin e trupave paqeruajtëse në Kosovë, pas tensioneve të fundit me Serbinë.
“Një rritje e konsiderueshme e numrit të ushtarëve dhe pajisjeve ushtarake të NATO-s në vendin tonë do të përmirësonte sigurinë dhe paqen në Kosovë dhe në të gjithë rajonin e Ballkanit Perëndimor”, tha Kurti për gazetën gjermane Die Welt më 1 janar.
I pyetur nëse NATO do të shqyrtojë një kërkesë të mundshme zyrtare të Qeverisë së Kosovës për rritjen e kapaciteteve, zyrtari i NATO-s tha se “çdo ndryshim në praninë e NATO-s bazohet në rrethana dhe kushte të caktuara”.
“Trupat e KFOR-it po monitorojnë nga afër situatën në terren dhe janë plotësisht të përgatitura për të ndërhyrë nëse kërcënohet stabiliteti, siguria dhe liria e lëvizjes,” i tha RSE një zyrtar i NATO-s.
Në një referencë shtesë për thirrjen e Kurtit, ai shton se NATO ka dekada të tëra e përkushtuar për stabilitetin në Ballkanin Perëndimor dhe se misioni i KFOR-it, me gati 4000 ushtarë, është “demostrimi më i prekshëm i këtij angazhimi”.
Forcat e misionit paqeruajtës të NATO-s në Kosovë, KFOR, u vendosën në Kosovë pas përfundimit të luftës në vitin 1999 me qëllim të garantimit të sigurisë.
Në përgjigjen e saj për Radion Evropa e Lirë, Qeveria e Kosovës ka bërë të ditur se kërkesa e kryeministrit ka të bëjë me “situatën e krijuar pas ngritjes së 16 barrikadave në katër komuna në veri të vendit nga grupet kriminale lokale, përfshirjen e personave me lidhjet direkte ose indirekte me ‘Wagner’ (një organizatë paraushtarake ruse) dhe ‘Ujqërit e natës’ (një organizatë e afërt me Vladimir Putin) dhe ‘deklaratat kërcënuese të Serbisë'”.
