Një 15-vjeçar nga Bangladeshi, i cili ‘u zhduk’ teksa luante ‘kukafshehti’ me miqtë e tij, u gjet gjashtë ditë më vonë në një shtet tjetër.
Sipas Daily Mail, djali, i identifikuar vetëm si Fahim, ngeci në një kontejner transporti gjatë lojës më 11 janar. I rraskapitur, ai ra në gjumë brenda kontejnerit, duke mos kuptuar se po dërgohej në Malajzi.
Ndërsa 15-vjeçari flinte, kontejneri u paketua dhe u dërgua për në Malajzi. Ai u largua nga Bangladeshi më 11 janar dhe arriti në destinacionin e tij më 17 janar – gjashtë ditë që Fahim i kaloi pa ushqim dhe ujë brenda kontejnerit.
Edhe pse 15-vjeçari bërtiti për ndihmë disa herë, ai nuk u zbulua derisa kontejneri arriti në destinacionin e tij, Port Klang i Malajzisë.
Aty ai u gjet i rraskapitur, i dehidratuar dhe duke qarë pasi zyrtarët në Malajzi dëgjuan një tingull trokitjeje që vinte nga kontejneri.
