Tërmeti vdekjeprurës i së hënës në Turqinë juglindore pothuajse ka shkatërruar një kështjellë 2000-vjeçare të ndërtuar gjatë Perandorisë Romake.
Kalaja e Gaziantepit është ndërtuar në shekujt II dhe III, para se të bëhej muze, raporton BBC.
Më shumë se 3.400 njerëz kanë humbur jetën në Turqi dhe Siri nga tërmeti i fuqishëm me magnitudë 7.8 ballësh të Rihterit, i cili i goditi të dyja vendet mëngjesin e hershëm të së hënës dhe lëkundjet tjera pas tij.
Disa nga fortifikimet e kështjellës janë shkatërruar nga tërmeti, ka thënë agjencia shtetërore turke e lajmeve Anadolu.
Kalaja u ndërtua nga romakët gjatë shekujve II dhe III, më pas u forcua dhe u zgjerua nga perandori bizantin, Justiniani I, në shekullin e 6-të. Ajo luajti një rol të rëndësishëm gjatë luftës së Turqisë për pavarësi në fillim të shekullit të 20-të.
Deri vonë kjo kala ka shërbyer si Muzeu Panoramik i Mbrojtjes dhe Heroizmit të Gaziantepit./REL
