Dy persona kanë rënë në prangat e policisë teksa tre të tjerë janë proceduar penalisht pasi goditën me grushta një mjeke dhe dëmtuan ambientet e spitalit ku ajo punonte. Shtetasit nga 41 në 55 vjeç kanë dhunuar mjeken pasi e ‘akuzonin’ atë se kishte neglizhuar të afërmin e tyre të shtruar në spital. Ata kanë dëmtuar edhe dyert e dritaret e spitalit.
Igli Spahija 41-vjeç dhe Bledar Bali, 54-vjeç të dy banues në Tiranë, kanë pasur në spitalin Infektiv të QSUT-së një të afërm të tyre, që ka qenë në gjendje intubimi pasi vuante nga disa sëmundje si dhe ishte infektuar me Covid-19 e që më pas ka ndërruar jetë. Gjatë orëve të mbrëmjes ai ka pësuar atak kardiak dhe si pasojë ka humbur jetën.
Njoftimi i policisë:
Goditën për shkak të detyrës një mjeke, dëmtuan dyert dhe dritaret e spitalit ku ajo punonte, arrestohen në flagrancë 2 shtetas, procedohen penalisht 3 të tjerë.
Të arrestuarit nuk iu bindën urdhrave të punonjësve të Policisë, të cilët shkuan në vendin e ngjarjes, për të kryer veprimet procedurale.
Specialistët për Hetimin e Krimeve të Komisariatit të Policisë Nr. 4, pas marrjes së njoftimit se disa shtetas kishin goditur për shkak të detyrës një mjeke dhe kishin dëmtuar ambientet e spitalit ku ajo punonte, kanë organizuar menjëherë punën për identifikimin dhe kapjen e autorëve.
Si rezultat i veprimeve të shpejta nga shërbimet e Policisë, u arrestuan në flagrancë shtetasit I. S., 41 vjeç dhe B. B., 54 vjeç, të dy banues në Tiranë.
Gjithashtu, u referuan materialet në Prokurori dhe nisi procedimi penal në gjendje të lirë për shtetasit: K. S., 50 vjeç (me precedent të mëparshëm penal), E. Xh., 47 vjeç dhe A. M., 55 vjeç.
Këta shtetas, rreth orës 02:00 të ditës së sotme, në ambientet e një spitali shtetëror, kanë goditur me grushte, për shkak të detyrës, një mjeke të këtij spitali, me pretendimin për neglizhencë mjekësore ndaj një të afërmi të tyre, që mjekohej në këtë spital, si dhe kanë dëmtuar dyert dhe dritaret e këtij institucioni.
Gjithashtu, këta shtetas nuk iu janë bindur urdhrave të punonjësve të Policisë që shkuan në vendin e ngjarjes, menjëherë pas marrjes së njoftimit për këtë rast.
Materialet i kaluan Prokurorisë pranë Gjykatës së Rrethit Gjyqësor Tiranë, për veprat penale “Goditje për shkak detyrës”, “Mosbindja ndaj urdhrit të punonjësit të Policisë së rendit publik” dhe “Shkatërrimi i pronës”, të kryera në bashkëpunim.
