Pjesa e parë e ditës së sotme do të jetë nën dominimin e motit të qëndrueshëm duke bërë që kthjellimet dhe vranësirat e lehta të jenë prezente në të gjithë territorin e vendit.
Orët e mesditës do të sjellin zhvillim të vranësirave në zonat veriore dhe verilindore me prani të reshjeve të izoluara shiu e dëbore. Pjesa e dytë e ditës dhe në vijim do të sjellë përmirësim të përkohshëm të motit si edhe ndërprerje të reshjeve nga i gjithë territori i vendit për të ri-kthyer kthjellimet dhe vranësirat e lehta e kalimtare.
Temperaturat e ajrit do të vijojnë të rriten në mëngjes, por do të mbeten konstante në mesditë duke luhatur vlerat ditore nga 2°C deri në 15°C.
Era do të fryjë me shpejtësi mesatare 50 km/h nga drejtimi Jugor-Juglindor duke krijuar në brigjet detare dallgëzim deri në 4 ballë.
