Kohët e fundit po qarkullojnë thashethemet se Lionel Messi është në bisedime për t’u rikthyer te Barcelona.
Për herë të parë që nga dalja e lajmeve, një përfaqësues zyrtar ka konfirmuar bisedimet mes dy palëve.
Zëvendëspresidenti i Barcelonës, Rafa Yuste e konfirmoi informacionin. “Ne kemi qenë në kontakt me ekipin e Leo Messit. Leo e di se sa shumë e vlerësojmë atë dhe se do të doja që ai të kthehej këtu,” tha Yuste.
Ai ishte gjithashtu i përfshirë në bisedimet që çuan në largimin e Messit nga klubi dy vjet më parë. “Isha i përfshirë në bisedimet për kontratën dy vjet më parë dhe ende mbaj mend se sa e vështirë ishte të lija Messin të largohej”, kujton zëvendëspresidenti.
Ai nuk e fshehu faktin se klubi po përpiqet të gjejë mënyra për të rikthyer Messin. “Leo Messi sigurisht që e do Barcelonën dhe qytetin, kështu që ne shpresojmë të mundësojmë kushtet e duhura për të vazhduar historinë e tij këtu”, tha ai.
Ish kolegu i Messi-t dhe trajneri aktual i Barcelonës, Xavi ka folur rreth kësaj çështje duke shprehur dëshirë për një rikthim të Messi-t.
“Shpresojmë ta shohim përsëri në Barcelonë”
Trajneri i Barcelonës, Xavi është pyetur edhe për një rikthim të mundshëm të argjentinasit. Ai nuk ka dashur të zbulojë shumë informacione, por ka konfirmuar se klubi e dëshiron atë.
“Nuk është koha për të folur për kthimin e Messit. Unë flas shumë me të. Është një temë që po diskutojmë me njëri tjetrin. Shpresojmë ta shohim përsëri në Barcelonë. Është klubi i jetës së tij,” tha Xavi.
