Prokurori i çështjes kundër ish- presidentit amerikan Donald Trump, ka dhënë një deklaratë pas përfundimit të seancës së sotme.
Alvin Bragg deklaroi se nuk mund të lejohet që bizneset e Nju Jorkut të manipulojnë të dhënat e tyre për të mbuluar sjelljen kriminale.
“Populli i Shtetit të Nju Jorkut pretendon se Donald Trump falsifikoi në mënyrë të përsëritur të dhënat e biznesit të Nju Jorkut për të fshehur krimet që fshihnin informacione nga publiku votues gjatë zgjedhjeve presidenciale të vitit 2016.
Manhattan është shtëpia e tregut më të rëndësishëm të biznesit të vendit. Ne nuk mund t’i lejojmë bizneset e Nju Jorkut të manipulojnë të dhënat e tyre për të mbuluar sjelljen kriminale.
Gjurmët e parave dhe gënjeshtrave ekspozojnë një model që, pretendon se shkel një nga ligjet themelore të biznesit të Nju Jorkut”, tha ai.
Ai thotë se Trump ka bërë vazhdimisht deklarata të rreme për të dhënat e biznesit të Nju Jorkut dhe ka bërë që të tjerët të bëjnë deklarata të rreme.
Ai pretendoi se po paguante Michael Cohen për shërbimet ligjore, gjë që sipas prokurorit nuk është e vërtetë.
“Për nëntë muaj rresht, i pandehuri mbante në dorë dokumente që përmbanin këtë gënjeshtër,” shton ai.
Prokurori tha se Trump nënshkroi çeqe për Cohen gjatë secilit prej nëntë muajve, ndërsa shtoi se Trump i bëri këto deklarata të rreme për të mbuluar krimet që lidhen me zgjedhjet e vitit 2016.
Kujtojmë se Michael Cohen është ish-avokati i Trump, i cili ka pranuar se i ka paguar yllit porno, Stormy Daniels, 130,000 dollarë përpara zgjedhjeve të 2016-ës në këmbim të heshtjes së saj për një marrëdhënie të supozuar seksuale të së kaluarës me Trump, të cilën ai e mohon.
Bragg argumentoi se zyra e tij ishte e detyruar të ndiqte çështjen kundër Donald Trump, pavarësisht nga reputacioni dhe ish posti i Trump.
“Ne sot mbajmë përgjegjësinë tonë solemne për të siguruar që të gjithë të qëndrojnë të barabartë përpara ligjit. Asnjë sasi parash, asnjë sasi pushteti nuk e ndryshon atë parim të qëndrueshëm amerikan”, tha Bragg në konferencën e tij për shtyp.
Ai ka bërë me dije se synohet që një nga dëshmitaret që pritet të thirret të flasë para gjykatës është ylli i filmave porno Stormy Daniels, e cila ka deklaruar gatishmërinë për të dëshmuar kundër ish- presidentit, në lidhje me pagesën e marrë nga avokati i tij për të mos bërë publike informacionet mbi marrëdhënien e tyre, çka do të dëmtonte fushatën për zgjedhjet presidenciale.
