Në makinën e kryetarit të Partisë Demokratike në Vaun e Dejës, Benard Ndreca u vendos eksploziv mëngjesin e sotëm. Në një prononcim për mediat ai ka theksuar se nuk ka asnjë konflikt të hapur me asnjë dhe se e gjithë kjo ka lidhje politike.
Ndreca ndër të tjera ka theksuar se nga pamjet rezulton se kanë qenë dy persona të maskuar ato që kanë vendosur lëndën shpërthyese.
“Ky është një incident i mirëorganizuar që na ka ndodhur mua dhe familjes sime unë nuk kam asnjë konflikt. Unë jam vendas këtu dhe as unë as, farefisi dhe as familja s’kemi asnjë. Ky incident e ka një emër dihet që është politik, mua më është bërë politik, çdo gjë është e filmuar pasi shtëpia është me kamera. Në orën 06.30 sapo kam leviz makinën ka shpërthyer.
Unë nuk kam asnjë lloj konflikti të hapur me asnjë, kjo është e përdorur politikisht, nuk është vendosur mina Benard Ndrecës, por i është vendosur kryetarit të Partisë Demokratike në Vaun e Dejës. Paraprakisht janë parë pamjet, vijnë dy persona rreth orës 01:15 të natës dhe vendosin ekspolozivin dhe ikin, janë dy persona të maskuar. Thirrja është duke filluar nga kryeministri, ministri i Brendshëm, drejtorët që të distancojnë policinë nga politika pasi në Vaun e Dejës gjithmonë ndodh që ato të përfshihen. Vullneti i njerëzve dihet se ku shkon, nuk mbahet bashkia me presione” – ka thënë ai.
