Sot është publikuar në gazetën zyrtare të BE-së rregullorja e cila mundëson liberalizimin e vizave për Kosovën. Kjo rregullore hyn në fuqi më 15 maj të këtij viti.
Në këtë rregullore theksohet se të përjashtuar nga kërkesa për vizë janë vetëm mbajtësit e pasaportave biometrike që janë të lëshuara nga Kosova dhe në përputhje me standardet Organizatës Ndërkombëtare të Aviacionit Civil (ICAO).
“Ky përjashtim nuk duhet të zbatohet deri në datën nga e cila fillon të funksionojë Sistemi Europian i Informacionit dhe Autorizimit të Udhëtimit (ETIAS), i krijuar nga Rregullorja (BE) 2018/1240 e Parlamentit Europian dhe e Këshillit ose deri më 1 janar 2024, cilado datë që vjen e para”, thuhet në këtë rregullore.
Njohësi i integrimeve europiane, Demush Shasha, tha se kjo kohë do t’iu mjaftojë institucioneve të Kosovës të ndërmarrin fushatat e nevojshme të informimit për të drejtat dhe obligimet e qytetarëve që burojnë nga lëvizja e lirë në Zonën Schengen.
“Por edhe do jap mjaftueshëm kohë autoriteteve kufitare të vendeve të BE-së të përgatiten për lëvizjen e lirë të qytetarëve të Kosovës nga 1 janar 2024”.
Rregulloren e publikuar mund ta gjeni KËTU
