Kryeministri i Kosovës, Albin Kurti, foli për mediat pas përfundimit të takimit me president serb Vuçiç në Bruksel. Kreu i qeverisë së Kosovës u shpreh se e ka dëgjuar, ka parë, dhe ka lexuar draft-statutin e prezantuar nga Ekipi Menaxhues, ndërsa tha se një draft i tillë ishte i papajtueshëm me kushtetutshmërinë.
Kurti theksoi se ka propozuar një draft , të cilin ai e ka quajtur “draft-vizion” mbi kornizën që rregullon çështjen e komuniteteve jo-shumicë në Kosovë.
Kurti: “Në këtë takim pas marrëveshjes për të pagjeturit ne e dëgjuam me durim dhe vëmendje ekipin menaxhues që prezantoi një draft-statut në gjithsej 67 nene dhe më pas dhamë qëndrimi tonë se një draft i tillë çfarë dëgjuam e lexuam është fundamentalisht i papajtueshëm me kushtetutshmërinë, ligjshmërinë, të drejtat e njeriut, vlerat evropiane, të drejtat e pakicave sipas standardeve evropiane dhe përkundër kësaj ne do jemi të interesuar të gjejmë zgjidhje. Me këtë rast unë propozova një draft vizion si kryeministër përkitazi me nenin 7 të marrëveshjes bazike duke pasur në konsideratë edhe nenin 10. Gjithsej në 10+1 pika kam propozuar një vizion se si do duhej të ishin vlerat dhe principet, korniza që rregullon çështjen e komuniteteve joshumicë, pakicave”
