Mëngjesin e sotëm një plagosje me armë zjarri la ndodhur në Tropojë. Sipas njoftimit të policisë, mësohet se i plagosur dhe autori janë përleshur fizikisht fillimisht për motive të dobëta. Mësohet se Bardhyl Kolbiba pas sherrit, ka kanosur me thikë personin tjetër Izet Ahmatin.
Më pas, ky i fundit, ka marrë kallashnikovin dhe ka qëlluar drejt Kolbibës, duke e lënë të plagosur. I plagosuri është dërguar në spital, ku dhe ndodhet jashtë rrezikut për jetën, ndërsa Ahmati ëhstë vënë në pranga. Në foton e publikuar nga policia duken shkurret e lyera me gjak dhe kallashnikovi i sekuestruar.
Njoftim i policisë:
Plagosi me armë zjarri 39-vjeçarin, Policia arreston në kohë rekord autorin. Sekuestrohet edhe arma e krimit, kallashnikov. Sot, rreth orës 07:10, në fshatin Luzhe, si pasojë e një konflikti të çastit për motive të dobëta, shtetasi I. A., 46 vjeç, ka plagosur me armë zjarri shtetasin B. K., 39 vjeç, banues në Luzhë, i cili është transportuar për mjekim në spitalin e Tropojës dhe ndodhet jashtë rrezikut për jetën. Menjëherë në vendngjarje janë nisur shërbimet e Policisë, të cilat falë veprimeve të shpejta dhe profesionale bënë të mundur kapjen dhe prangosjen e autorit, shtetasit I. A., i cili ishte fshehur në një banesë të braktisur në periferi të fshatit.
Shërbimet e Policisë kanë bërë të mundur gjetjen dhe sekuestrimin e armës së krimit, kallashnikov me një krehër me municion luftarak. Gjithashtu, në cilësinë e provës materiale është sekuestruar edhe një armë e ftohtë thikë me të cilën dyshohet se në momentin e konfliktit të çastit, i dëmtuari ka kanosur me thikë autorin dhe më pas konflikti është përshkallëzuar në përdorimin e armës nga 46-vjeçari.
Grupi hetimor, nën drejtimin e Prokurorisë së Rrethit Gjyqësor Tropojë, vijon punën për zbardhjen dhe dokumentimin e plotë të rrethanave të ngjarjes.
