Pavioni shqiptar “Në shtëpinë tonë” prej disa javësh po qëndron në Bienalen e Arkitekturës në Venecia, Itali. Shqipëria këtë vit përfaqësohet në këtë edicion nga katër vajza arkitekte: Fiona Mali, Irola Andoni, Malvina Ferra dhe Rudina Breçani.
Pavijoni feston lagjen, një lidhje dikur e pashmangshme që përcakton jetën tonë, plotëson nevojën tonë për t’i përkitur, dhe shndërron adresën tonë në një vend. Në Shqipëri, më pak se njëzet vjet më parë fqinjët ishin më të bashkuar se sa me të afërmit. Sot, vetëm një brez më vonë, duke u zhytur në humnerën e globalizimit, edhe ne po shkojmë drejt indiferencës dhe pasigurisë së izoluar.
Duke theksuar në mënyrë simbolike atë që mund të jetë përtej mureve të banesës sonë, pavijoni ofron një ftesë për t’i kapërcyer ato dhe për të zbuluar sërish dhuratën e përfaqësuar nga kjo lidhje. Tre apartamente fqinje ndajnë fshehtas një hapësirë që mund të dalë në dritë vetëm nëse fqinjët janë të gatshëm ta zbulojnë. Njihni fqinjin tuaj! Së bashku fillon në shtëpitë tona dhe rrethinat e tyre të afërta – vendlindja e ndjenjës sonë të përkatësisë, vendit dhe komunitetit.
Ministrja e Kulturës Elva Margariti shprehet se Bienalja Ndërkombëtare e Arkitekturës së Venecias, me pyetjen “Si do të jetojmë së bashku”, na ka futur në rrjedhën e një diskutimi mbi atë çka kemi qenë, si kemi jetuar në komunitet dhe si do të ndërtojmë bashkëjetesën në kontekste të reja të globalizimit apo të të papriturave. “Mbrëmë, në një takim shumë të këndshëm me autoret e pavijonit shqiptar në Bienalen e Venecias, me rastin e prezantimit të botimit të realizuar me këtë rast, shkëmbyem ide dhe eksperienca personale mbi fqinjërinë, atë që e kujtojmë me nostalgji, por edhe për atë imponuesen, të dhunshmen. Pavarësisht këtyre eksperiencave, në fund të gjithë biem në një mendje se duhet të njohim më mirë fqinjët tanë”, shkruan në një status të saj ministrja Margariti.
Bienalja Ndërkombëtare e Arkitekturës u rihap këtë vit në maj, pas një periudhe mbylljeje njëvjeçare për shkak të sëmundjes globale. Konceptimi i përfaqësimit të Shqipërisë në Bienalen e Arkitekturës në Venecia bazohet në konceptin e fqinjësisë si një traditë tipike shqiptare dhe që gjatë ketij viti të vështirë na bëri të rijetojmë fqinjësinë edhe njëherë tjetër.
Në pavijonin shqiptar në Venecia, kjo pjesëmarrje vjen edhe me materiale me Arkivin Qendror të Filmit. Me titull “Si do të jetojmë së bashku?”, ekspozita e 17 e Bienales Ndërkombëtare e Arkitekturës është kuruar nga arkitekti i njohur Hashim Sarkis.
/Priza.al/
