Nëse ka një gjë që Lisa Marshall e di me siguri, është që burri i saj është “shpirti binjak”. Peter dhe Lisa Marshall po përqafoheshin në divan duke parë një shfaqje televizive kur Peter e pyeti nëse do të martohej me të. Ajo çfarë 56-vjeçari nuk mbante mend ishte se ata ishin tashmë të martuar.
I diagnostikuar me Alzheimer tre vjet më parë, Peter kishte filluar të humbiste kujtimet. Mes të tjerash ai kishte harruar dasmën, por me sa duket nuk e ka harruar kurrë dashurinë që ka për Lisa. “Ishte kaq prekëse për mua. Ai ra në dashuri me mua dy herë. Ndihem e nderuar. Ndihem si një princeshë, si Hirushja. Unë jam vajza më me fat në botë,” tha gruaja 54 vjeçare .
Çifti, të cilët janë të martuar prej 12 vjetësh, u takuan në Pensilvani. Të dy ishin të martuar me partnerë të tjerë asokohe, por lidhën një miqësi dhe qëndruan afër derisa familja e Peter u transferua në Connecticut.
Pas gati një viti të dy u rilidhën kur zbuluan se secili po kalonte divorc. Pas vetëm një takimi në Harrisburg, u bënë të pandashëm dhe qëndruan në një lidhje tetë-vjeçare, në distancë të largët, derisa fëmijët e tyre hynë në kolegj. Në vitin 2009, Lisa u transferua në Connecticut dhe u martuan.
Lisa tha se demenca nisi papritur. Gjithçka filloi kur ai harronte çelësat, pastaj portofolin. Më pas Peter nisi të harronte fjalët dhe çfarë kuptimi kishin ato. Por gjithçka ja lanë plakjes, derisa miqtë kuptuan që diçka nuk shkonte. Pas analizave të detajuara, Peter u diagnostikua me sëmundjen Alzheimer më 30 prill 2018.
Sëmundja ndikoi shpejt mbi jetën e çiftit. Por, herën e parë që ai harroi kush ishte gruaja e tij, ata ishin në një udhëtim në Rhode Island.
“Kur ishim duke shkuar në shtëpi, Peter po më jepte udhëzime dhe më pas vazhdonte të thoshte gjëra të tilla: Kjo është rruga për në shtëpinë time. Kthehuni djathtas për të arritur në shtëpinë time. Sikur të isha shofere dhe nuk e dija se ku jetonim. Kur u kthyem në shtëpi, ai vrapoi pranë meje dhe më hapi derën dhe më futi në shtëpinë tonë dhe ishte aq nervoz duke më treguar përreth. Ai nuk u kthye më në realitet.”, tha Lisa
Pavarësisht të gjithave më 26 prill, Peter dhe Lisa u gjendën sërish në altar.
“Unë jam personi i tij i preferuar. Unë nuk kam nevojë për një etiketë, si gruaja, ose pseudonime që më vendoste. Ne do të jemi së bashku deri në fund. Asgjë nuk mund të na ndajë. Asgjë”, thotë ajo.
/Burimi The Guardian/ përshtati në shqip Priza.al/
