Policia ka arrestuar 20-vjeçarin I.A., i cili kishte kultivuar disa fidanë kanabisi në një tokë në pronësi të tij në fshatin Shpataj, në Tiranë.
Shërbimet e Komisariatit të Policisë Nr.1, në zbatim të planit të masave “Për parandalimin dhe goditjen e veprimtarisë kriminale të kultivimit të bimëve narkotike’’, bazuar dhe në informacione të siguruara në rrugë operative, si rezultat i kontrolleve të vazhdueshme të territorit, kanë evidentuar një rast të tentativës për kultivim të kanabisit në fshatin Shpataj, Njësia administrative Baldushk.
Në vijim të veprimeve, specialistët për Hetimin e Krimeve në Komisariatin e Policisë Nr.1 bënë arrestimin në flagrancë të shtetasit I. A., 20 vjeç, banues në fshatin Shpataj, pasi gjatë kontrollit në tokën në pronësi të tij, në një sipërfaqe të pyllëzuar, u gjetën të kultivuar fidanë të dyshuar cannabis sativa.
Gjithashtu, u procedua në gjendje të lirë babai i tij, shtetasi H. A., 58 vjeç, pasi gjatë kontrollit të banesës, iu gjet dhe iu sekuestrua një armë gjahu. Materialet i kaluan Prokurorisë, për veprime të mëtejshme.
/Priza.al/
