Një shtetas polak, 50-vjeçar është ndaluar nga policia shqiptare ne Bypass-in e Fierit, pasi po udhëtonte me një makinë luksoze ‘Ferrari’ me shpejtësi skëterrë 231 km/h. Mbase në Poloni do të hezitonte të ecte mbi trefishin e shpejtësisë së lejuar, por në Shqipëri polaku ka pasur guximin të bëj diçka të tillë, ndoshta i nxitur nga kontrollet jo të rrepta të vendit tonë.
Policia bën me dije se nga verifikimet e kryera në bashkëpunim me Interpolin, ka rezultuar se ky automjet është i shpallur në kërkim në Gjermani, për mungesë siguracioni. Gjithashtu, leja e drejtimit që ky shtetas i paraqiti policëve, ishte e falsifikuar. Identiteti i 50-vjeçarit ende nuk bëhet me dije.
Polaku u arrestua për veprat penale “Përdorimi i dokumenteve të falsifikuara” dhe “Falsifikimi i vulave, stampave ose i formularëve”. Po ashtu ai u gjobit me 80.000 lekë, për tejkalim të normave të shpejtësisë dhe mungesë siguracioni.
Automjeti tip “Ferrari” u sekuestrua në cilësinë e provës materiale. Policia apelon edhe njëherë për të gjithë shoferët, vendas dhe të huaj, që të respektojnë sinjalistikën rrugore.
/Priza.al/
